د امر بالمعروف او نهې عن المنکر وزارت سرپرست وایي، د نړیوالو له لوري فشارونه، دسیسو جوړول او پر مهمو چارواکو د جایزو ټاکل د سرپرست حکومت نظریه او اهداف نه شي بدلولی.
نوموړي دا څرګندونې په هغه غږيز کليپ کې کړې چې د ملي ټلوېزيون له لوري خپور شوی او په کې زیاته شوې، مخالفان د اسلام او د اسلامي نظامونو د بدنامولو په هڅه کې دي.
حنفي د يادو هڅو پر وړاندې پر صبر، استقامت او تقوا ټينګار کړی.
هغه زیاته کړې:« ستاسو خلاف به منصوبات جوړوي، تکلیفونه به وي او پالیسۍ به وي؛ نو تاسو به څه کوئ؟ الله تعالی فرمايي، تاسو به خپله نظریه نه پرېږدئ او په دې وخت کې به استقامت څخه کار اخلئ. د کفارو، مکارو مکرونه، د کفارو منصوبه به ادامه لري، خو تاسو به متضرر کېږئ نه. که څوک اخطارونه در کوي او میلیونه جایزې ټاکي، نو استقامت دا دی چې مسلمان خپل هدف نه پرېږدي.»
د سیاسي چارو شنونکي بیا د خالد حنفي خبرو ته په پام سره د نړيوالو فشارونو پر وړاندې د سرپرست حکومت له لوري د تدبير او سنجول شویو پالیسيو پر اختيارولو ټينګار کوي.
دوی زياتوي، سرپرست حکومت دې نور افغانان له موجوده ستونزو خلاص کړي.
د سیاسي چارو شنونکی شهسوار سنګروال وايي: « له یوې خوا نړۍ له خپلې سخت دریځۍ نه اوړي او له بلې خوا په داخل کې د اسلامي امارت چارواکي له زغم نه کار نه اخلي، زه فکر کوم د دې کار ډېر زیان ولس ته رسېږي. ښه دا ده چې په دې برخه کې له مسوولیته ډک چلن وشي او اسلامي امارت هغه څه ومني چې نړیوال یې د اسلام په چوکاټ کې غواړي. د افغانستان خلک نور د دې توان نه لري چې لوږه، بېکاري او بېوزلي تحمل کړي؛ ځکه د دې ټولو فشارونو کفاره ولس پرې کوي.»
ځینې نور بیا په دې باور دي چې د نړیوالو له لوري واردېدونکي فشارونه په افغانستان کې بشري وضعيت نور هم سختولی شي.
د سیاسي چارو شنونکی اختر محمد راسخ وايي: « تاسو ته مالومه ده چې امریکا هغه ۴۰ میلیونه اونیزې مرستې بندې کړې چې د نړیوالو موسسو لپاره یې استولې. د امریکا ولسمشر په تکرار سره وايي چې د باګرام اډه ورته ارزښت لري، خو طالبانو هم په کراتو ویلي چې هېڅ ډول فشار ته به تسلیم نه شي. که چېرې د سیاست په ډګر کې دوی له غربي نړۍ سره راکړه ورکړه ونه لري، افغانستان کې به نوې جګړې او ناخوالې رامنځته شي.»
له دې وړاندې د اسلامي امارت مشر هم ټینګار کړی و چې د بهرنیانو له لوري فشارونه پر اسلامي امارت هېڅ ډول اغېز نه لري او د سرپرست حکومت د استحکام ترڅنګ به د شریعت تطبیق ته دوام ورکړي.
