د خوست ولایت علیشرو تریزیو ولسوالۍ اړوند بوخانې کلي کې نا مالومو وسله والو د یوې کورنۍ ۱۳ غړي پر ډزو وژلي دي.
چارواکي وايي، په وژل شویو کې د یوې داسې مېندواره ښځې په ګډون چې درې ماشومان یې په نس و، دوه لویان، شپږ ښځې او پنځه ماشومان شامل دي.
د دې کورنۍ یو تن غړی وایي، له چا سره یې شخصي ستونزه نه لرله او لاهم نه پوهېږي چې ولې او د چا له خوا ورسره یاده پېښه شوې.
د قرباني شوې کورنۍ د تره زوی ټیکه خان وايي: « دا پېښه د شپې اته نیمې بجې شوې. له پېښې وروسته د ولسوالۍ کسان راغلل، مړي او ټپیان یې را پورته کړل او بیا یې ملکي روغتون ته یوړل. په روغتون کې تر څېړنو وروسته یې موږ ته خپل مړي وسپارل . موږ له هېچا سره دوښمني نه لرو او نه هم د پېښې په اړه په چا شک لرو.»
د سیمې اوسېدونکي د دې پېښې له امله سخت خواشیني دي او له سرپرست حکومت غوښتنه کوي چې د دا ډول وحشیانه جنایتونو د مخنیوي لپاره جدي ګامونه پورته کړي.
دوی ټینګار کوي چې د یادې پېښې عاملین دې ژر تر ژره وپېژندل شي او سخته سزا دې ورکړل شي، ترڅو په راتلونکي کې دا ډول پېښې تکرار نه شي.
د سیمې اوسېدونکی عظیم وايي: « له دولت غوښتنه کوو چې د دا ډول پېښو مخنیوی وکړي، ځکه چې په ذهنونو سخت اغېز کوي، دا د راتلونکي نسل لپاره ډېرې غټې پېښې دي.»
د سیمې یو بل اوسېدونکی صدیق الله سیار وايي: « له حکومت او امنیتي ځواکونو غوښتنه کوو چې د پېښې عاملین ژر تر ژره ونیسي، په عام محضر کې یې اعدام کړي، ترڅو راتلونکي کې څوک د دې ډول پېښو جرئت ونه کړي.»
ورته مهال، ځایي چارواکي وايي، د پېښې د نوعیت په اړه لا هم کره معلومات نه دي ترلاسه شوي خو په خبره یې په تړاو یې پنځه شکمن کسان نیول شوي او د نورو ښکېلو اړخونو په اړه هم څېړنې روانې دي.
دوی زیاتوي، نیول شوي کسان به د نورو څیړنو لپاره عدلي او قضایي ارګانونو ته وسپارل شي.
د خوست امنیې قوماندانۍ د امنیت آمرعبدالحلیم حیدر وايي: « موږ تر سهاره پورې د پېښې په ځای کې تېره کړه او شکمن کسان مو ونیول. موږ د پېښې له ځایه ۵ تنه نیولي او لاهم څېړنې روانې دي. په دې تړاو به ټول مشکوک کسان نیول کېږي.»
که څه هم په افغانستان کې د جګړې له پای ته رسېدو وروسته د امنیتي پېښو کچه د پام وړ کمه شوې او له امله یې د مرګ ژوبلې شمېر هم ټیټ شوی، خو لا هم د شخصي دوښمنیو، کورنیو شخړو او نورو ناڅرګندو دلایلو له امله وخت ناوخت دا ډول خونړۍ پېښې رامنځته کېږي.
معلومات ښيي چې د دغه شان پېښو علتونه تر ډېره د کورنیو ترمنځ شخړې، غچ اخیستنې او د ملکیتونو په سر اختلافونه وي.
همدارنګه، د دې ډول پېښو اکثریت قربانیان ښځې او ماشومان وي.
