پلازمېنه کابل ښار چې شاوخوا ۸ میلیونه وګړي په کې ژوند کوي، د نورو ښارونو په پرتله په کې ګڼه ګوڼه ډېر زیاته ده.
د کابل ښاروالي د فرهنګي چارو سلاکار نعمت الله بارکزی وايي، د موټرونو د ګڼه ګوڼې کمولو په موخه په دې ښار کې د وسایطو د تګ راتګ لپاره درې ستر پلونه جوړوي.
د بارکزي په خبره، د موټرو دغه هوايي پلونه د کابل ښار په درېیو له ګڼې ګوڼې ډکو سیمو کې پلان شوي چې راتلونکې میاشت به یې د جوړېدو عملي چارې پیل شي.
بارکزی څرګندوي:« د موټرو پلونو په اړه ویلی شم چې موږ د کابل ښار په درېیو ساحو کې د دغو پلونو جوړولو پلان لرو. یو پل د نجات منار په ساحه کې د انټرچېنج په بڼه جوړېږي، بل پل د برکي په څلور لارې کې او درېیم هم د کابل ولایت ته مخامخ د جوی شیر په طرف د پراختیايي سړک سره جوړېږی. د دغو پلونو د ډیزاین چارې بشپړې شوې او راتلونکې میاشت کې به یې عملي کارونه پیل شي.»
په همدې حال کې د کابل ښاروالۍ چارواکي زیاتوي، روان کال د کابل ښاروالۍ له خوا د ۶.۴ میلیارده افغانیو په ارزښت ۱۶۵ بېلابېلې پروژې پلان شوې وې چې ډېری یې د بشپړېدو په حال کې دي.
د کابل ښاروالۍ د پلان او پالیسۍ د ارزونې او نظارت رییس محمد قاسم افغان وايي: « کابل ښاروالۍ د ۱۴۰۳ کال په انکشافي پلان کې ۱۶۵ پروژې شاملې وې چې په دې کې د سړکونو او کانالونو جوړولو پروژې، د تنظیف پروژې، د سرسبزۍ، د سړکونو د حفظ او مراقبت پروژې وې چې له ډلې یې اکثریت پروژې د تطبیق پړاو ته رسېدلې دي.»
د کابل ښاروالۍ د فرهنګي چارو سلاکار نعمت الله بارکزی وايي: « کابل ښاروالۍ روان کال ۱۶۵ پروژې تر کار لاندې لرلې چې ۶.۴ میلیارده افغانۍ لګښت پرې راځي او ټول د ښاروالۍ له داخلي عوایدو ورکول کېږي.»
د کابل ښاروالۍ چارواکو د خبریالانو د پوښتنو ځوابولو پرمهال وویل، راتلونکي کال کې د کابل ښار لپاره له ۲۵۸ ډېرې پروژې پلان شوې او د تطبیق لپاره یې ۸.۲ میلیارده افغانۍ بودېجه پېشنهاد کړې ده.
د کابل ښاروالۍ د پلان او پالیسۍ د ارزونې او نظارت رییس محمد قاسم افغان وايي: « په دې پلان کې ټولټال ۲۵۸ پروژې په پام کې نیول شوې چې له ډلې یې ۷۸ د تېر کال د نیمه کاره سړکونو بشپړول او ۶۸ نویو سړکونو جوړول په کې شامل دي. دغه سړکونه به لومړی ډیزاین شي، بیا یې تدارکاتي پروسه پيل کېږي او د کابل په وروستۍ برخه کې یې ښايي عملي کارونه هم پیل شي. د دې ټول پلان لپاره شاوخوا ۸.۲ میلیارده افغانۍ بودېجه پېشنهاد شوې او له منظورۍ وروسته به یې جزئیات له رسنیو سره شریک شي.»
د کابل ښاروالۍ مسوولینو د حکومت د رسنیو په مرکز کې د خپلو لاسته راونو شریکولو په پروګرام کې دغه راز وویل، په وروستیو پنځو میاشتو کې ۵۴ کیلومټره نوي سړکونه جوړ شوي او همدا راز د ۱.۶میلیارده افغانیو په ارزښت، د ښار اوسېدونکو ته د جایدادونو د استملاک حقوق ورکړل شوي دي.
د دوی په خبره، په یاده موده کې د کابل ښاروالۍ تنظیف ریاست ۳۷۲ زره مټریک ټنه کثافات له ښاره پاک کړي او د نیالګیو کېنولو د خزاني کمپاین پرمهال یې ۱۰۰ زره نوي نیالګي کېنولي دي.
د کابل ښاروالۍ چارواکو دغه راز وویل، په دې موده کې ۱۳ زره ۲۰۰ کوڅه ډبي سپي له ښار راټول شوي، شاوخوا ۷ زره یې له منځه وړل شوي او شپږ زره نورو ته واکسین لګول شوی دی.
