د پاکستان بهرنیو چارو وزارت د اسلامي امارت د امنیتي او تصفیوي کمیسیون د راپور په اړه غبرګون ښودلی.
دغه راپور د تېرې چهارشنبې په ورځ خپور شو او په کې ادعا شوې چې پاکستان په افغانستان کې د ناامنۍ ایجادولو لپاره خپله خاوره کې وسله وال ترهګر روزي او بیا یې افغانستان ته را استوي.
د پاکستان د بهرنیو چارو وزارت ویاند اسلام اباد کې يوه خبري کنفرانس ته د خبرو پرمهال د اسلامي امارت دغه ادعاوې رد کړې، پروپاګند او له واقعیته یې لري ګڼلې.
شفقتعلي خان برعکس بیا ځل ادعا کړې چې د پاکستاني طالبانو تحریک (ټي.ټي.پي) کسان چې په پاکستان کې پوځي اهداف پر نښه کوي، په افغانستان کې پټنځایونه لري او له دې ځایه ملاتړ ترلاسه کوي.
د پاکستان د بهرنیو چارو وزارت ویاند زیاته کړې: « موږ دغه ادعاوې ردوو. ورته څرګندونې ځمکنیو واقعیتونو سره هېڅ راز اړخ نه لګوي. دا یوازې عجیب او د معمول خلاف پروپاګنډا ده. پاکستان په خپله د ترهګرۍ قرباني دی، زما ډېری همکاران دلته ترهګریز مسایل ترپوښښ لاندې راوستي. دوی پوهېږي چې څه روان دي، په افغانستان کې د ټيټيپي د پټنځایونو په تړاو زموږ جدي اندېښنې لا پر خپل ځای دي. ټيټيپي له هغه ځایه د خپل ملاتړ د سرچینې، لوجسټیک او نورو عملیاتي لارو چارو په موخه کار اخلي.»
شفقت علي خان دغه راز د یوې پوښتنې په ځواب کې له افغانستانه د امریکا تر وتلو وروسته د دې هېواد د پوځي تجهیزاتو شتون د پاکستان او د سیمې هېوادونو لپاره د اندېښنې وړ بللی.
هغه ویلي، د افغانستان حکومت باید هېوادونو ته دا ډاډ ورکړي چې دغه وسلې د ترهګرو ډلو لاس ته نه لوېږي.
شفقتعلي خان په دې اړه زیاته کړې: « ترکومه ځایه چې په افغانستان کې د امریکايي پوځي تجهیزاتو د شتون اندېښنه ده، باید ووایم چې د افغانستان سرپرست حکومت په دې اړه مسوولیت لري چې په هېڅ صورت اجازه ورنه کړي دغه وسلې د ترهګرو ډلو لاس ته ولوېږي. دغه کار د سیمه ییزو هېوادونو لپاره مهمه اندېښنه هم ده.»
هڅه مو وکړه چې د پاکستان د بهرنیو چارو وزارت د دې څرګندونو په تړاو د سرپرست حکومت نظر هم له ځان سره ولرو؛ خو له پرله پسې اړیکو سره یې مسوولانو خپل نظر له موږ سره شریک نه کړ.
بله خوا، د سیاسي چارو شنونکي ترهګري او پاکستان سره نه بېلېدونکي توري بولي او وايي، پاکستان تل په افغانستان کې د ناامنۍ لټه کړې، له همدې کبله دغه هېواد نه شي کولی په داسې اظهاراتو او څرګندونو د ترهګرۍ نوم له ځانه لرې کړي.
د سیاسي چارو شنونکی شېرحسن حسن وايي: « پاکستان د مرکزي واکمنۍ پر وړاندې د وسله والو مخالفینو د روزلو، هغوی د وسلو او پیسو د ورکولو او د هغوی د ملاتړ لوی مرکز و. دا سلسله اوس هم ادامه لري او د داعش ډله د لومړي ځل لپاره له منځني ختیځ څخه پاکستان ته راغلې او همدا اوس په پاکستان کې وجود لري.»
همدارنګه، د پوځي چارو شنونکي د امریکا پاتې پوځي تجهیزات د افغانانو ملکیت ګڼي او له همدې کبله د دې مسلم حق لري چې د ځان د دفاع او امنیت ساتنې لپاره ترې ګټه واخلي.
دوی د ترهګرو لاس ته د پوځي تجهیزاتو لوېدلو په تړاو د پاکستان یا بل هېواد اندېښنې بېځایه ګڼي.
د پوځي چارو شنونکی یوسف امین ځاځی وايي: « پاکستان یو تروریستي هېواد دی او موجودیت یې نړۍ، سیمې او افغانستان ته خطر دی. بنا ًد پاکستان خبرې موږ ته اهمیت نه لري.»
د وسله والو لاس ته د پوځي تجهیزاتو لوېدلو په تړاو د پاکستان د بهرنیو چارو وزارت اندېښنه داسې مهال ده چې سرپرست حکومت تل ډاډ ورکړی هېڅ راز وسله والې ډلې ته په افغانستان کې د فعالیت او تحرکاتو اجازه نه ورکوي او نه پرېږدي چې افغان خاور د نورو هېوادونو په ضد وکاروي.
