Skip to content
د هرات صنعتي پارک،چې د هېواد پر کچه د بېلابېلو خوراکي او غیر خوراکي توکو د تولید او کارموندنې لوی مرکز بلل کېږي،د حکومت په بدلیدو سره يې فعالیتونه رالویدلي دي.
د یاد ولایت صنعت او کانونو خونې مشر حمیدالله خادم وايي، د وروستي تحول له امله یوشمیر کارخونو د خپل فعالیت کچه راکمه کړې، تولیدات کم شوي او ګڼ شمیر کسان بېکاره شوي دي.
خادم زیاته کړه:« د هرات صنعتي پارک له دې امله،چې بازار لویدلی یوشمیر کارخونو خپل ۲۴ ساعته فعالیتونه کم کړي دي.»
خادم وايي، وروستي اوښتون پرټولو برخو خپل منفي اغیز پرېښی او له حکومته غواړي، چې د وضعیت عادي کېدو لپاره یولړ ګامونه واخلي.
هغه وايي، پر خامو موادو د پخوا پرتله مالیه لوړه شوې،چې دغې چارې هم د صنعت کارانو کاروبار له ستونزو سره مخ کړی.
خادم زیاتوي:«د کارخونو د خامو موادو تعرفي دي ټیټي شي،ترڅو کوم شکایتونه چې صنعت کاران لري،هغه لیري شي.»
د هیواد د نورو ولایتونو په څیر هرات کې هم بانکي چوپړونه په سمه توګه نه دي پيل شوي او خلک په اسانۍ سره خپلو پيسو ته لاسرسۍ نه لري.
د هارت ولایت اوسېدونکی محمد شعیب وايي:« موږ د هغو پیسو،چې د خپل ورځني ژوند لپاره ورته اړتیا لرو،یوه اندازه لږ پيسې مو غوښتلې،چې له بانکه يې واخلو. خو ومو نشو کړی،چې ترلاسه يې کړو.»
که څه هم، بهرته د لویدیځي حوزې د صادراتو کچه کې زیاتوالی راغلی،خو د افغانستان شتمنې کنګل کېدو سوداګر د پيسو لیږد په برخه کې له ستونزو سره مخ کړي دي.
د هرات سوداګرۍ خونې مشر محمد یونس قاضي زاده وايي:« هېله لرو،چې د صادراتي توکو د پيسو د راوړلو لپاره د بانکي سیستم له لارې یو لړ ګامونه واخېستل شي او هیله ده،چې د هېواد د صادراتو بازار هرڅه ژر سم او پرمختګ وکړي.»
د دې ترڅنګ دولتي کارکوونکو له تېرو دوو میاشتو راهیسي خپل معاشونه نه دي ترلاسه کړې،چې دې چارې هم په بازار کې د راکړې ورکړي پر وضعیت اغیز کړی دی.
ځايي چارواکي وايې،هڅه کوي،چې صنعت کارانو ته د اسانتیاوو رامنځته کېدو په برخه کې اړین ګامونه واخلي.
د هرات والي مرستیال مولوي شیراحمد مهاجر وايي:« د صنعت او صنعتي پارک لپاره برنامې لرو او تر لاس لاندې مو دي او کار ورباندې روان دی. هغه توکي،چې هېواد کې تولېد کېږي، د هغوی پر خامو موادو د ماليې لوړوالي لامل هم د کورنیو تولیداتو ملاتړ دی.»
د هرات سوداګر هیله لري،چې اسلامي امارت د هغوی د ستونزو د هواري او اقتصاد پرپښو دریدو لپاره اړین ګامونه واخلي.
د هرات په صنعتي پارک کې دا مهال ۱۷۰ کارخونې فعاله دي،خو د تولېد او فعالیت کچه يې د پخوا پرتله څو برابره کمه شوې ده.
