جو بایډن:له افغانستان سره مو د جګړې پړاو پای ته رسېدلی او نوی پړاو پیل شوی

د امریکا متحده ایالتو ولسمشر جو بایډن د ملګرو ملتونو په ۷۶مې عمومي اسمبلۍ کې له افغانستان سره د اړیکو نوي پړاو پر دوام ټینګار وکړ او زیاته یې کړه،چې نور یې په افغانستان کې جګړه پای ته رسېدلې ده.

بایډن وايي:« موږ په افغانستان کې د شل کلنې جګړې دوره پای ته ورسوله او دا پړاو مو بند کړ،اوس زموږ یوه بله دوامداره دور پیل کېږي،چې هغه به د اړیکو او دیپلوماسۍ دور وي. موږ به په دې کې اوس له نویو لارو چارو پانګونه کوو او اړیکې به پالو. موږ به په دې دور کې د ډيموکراسۍ پر بنسټ ننګونو او ستونزو سره مقابله کوو.»

بایډن سربیره پر دې چې له ولس سره پر مستقیم اړیکو او له هغوی د ملاتړ خبره وکړه، د ښځو او بشري حقونو په خوندیتوب یې ټینګار وکړ او د ښځو پر وړاندې  یې د تاوتریخوالي مخالفت وکړ.

بایډن زیاتوي:« موږ ټول باید د ښځو لپاره او د ښځو او نجونو د حقونو لپاره همغږي واوسو. موږ  به خپلې ټولې اقتصادي او سیاسي لارې چارې پر کار واچو،چې د تاوتریخوالي مخه ونیول شي. دا کار باید له مرکزي امریکا نیولې،تر منځني ختیځ او افغانستان، ټولو ځایونو کې وشي.»

په ورته وخت کې د ناټو سرمنشي ینس سټولټنبرګ چې په نیویارک ښار کې یې د ملګرو ملتونو د مرکز مخ ته له رسنیو سره خبرې کولې، د افغانستان قضیه یې له تراژيدۍ ډکه وبلله.

سټلټنبرګ وویل، د روان وضیعت پرته هغوی ته بل بدیل موجود نه و،ځکه بل بدیل له وینې تویوونې ډک وو.

سټولټنبرګ وايي:«هغه څه،چې په افغانستان کې وشول، هغه د افغان ولس لپاره یو ټراژیدي ده.زموږ ټولو لپاره ډېره زړه ماتوونکې ده. موږ دغه هېواد له څو کلونو راهیسې تمویل کړ او ملاتړ  مو وکړ،خو موږ چې کله د خپل نظامي شتون د پای ته رسولو پریکړه کوله، موږ بل بدیل نه درلود. بل بدیل د مبارزې او جګړې و،چې موږ باید له طالبانو سره کړی وای او هغه پرېکړه په اوس وخت کې له وینې تویونې او ډېر خطر ډکه وه.»

اخوا د طالبانو له راتګ سره په دغه عمومي اسمبلۍ کې د افغانستان له لوري هېڅ کوم استازي ګډون نه و کړی او خبرې یې ونه کړې،خو تازه د طالبانو له لوري په یوه لیک کې په قطر کې د طالبانو د سیاسي دفتر ویاند سهیل شاهین د افغانستان له لوري په ملګرو ملتونو کې د دایمي استازي په توګه ټاکل شوی دی.