د ایران ولسمشر مسعود پزشکيان د تاجکستان پلازمېنې دوشنبې ته د خپل سفر په لړ کې د دې هېواد له ولسمشر سره پر دوه اړخېزو اړیکو سربېره، د افغانستان پر وضعیت او د سرحدونو د امنیت ساتنې په ګډون پر سیمه ییز تحولاتو خبرې کړې.
مسعود پزشکیان ویلي، افغانستان د ایران او تاجکستان په ګاونډ کې یو مهم هېواد دی او دغه راز یې په افغانستان کې ثبات د دواړو هېوادونو پر ګټه ياد کړی.
د ایران بهرنیو چارو وزارت ویلي: « د افغانستان اړوند پر مهمو مسایلو خبرې وشوې چې افغانستان زموږ په ګاونډ کې یو مهم هېواد دی. د دې هېواد وده او ټیکاو خپله ګټه بولو، موږ ته د پولو امنیت خورا مهم دی.»
د تاجکستان ولسمشرۍ ماڼۍ هم په یوه خبرپاڼه کې ویلي، امام علي رحمان او مسعود پزشکیان له ترهګرۍ او نشه يي توکو سره د مبارزې په برخه کې پر همکارۍ هم ټینګار کړی.
د نړیوالو اړیکو او سیاسي چارو کارپوهان د ایران او تاجکستان ولسمشرانو لیدنه د درې واړو هېوادونو اړیکو پیاوړتیا لپاره مهمه بولي او ټینګار کوي چې افغانستان کې سوله، ثبات او ټیکاو د سیمې او نړۍ لپاره اغېزناک رول لرلی شي.
د نړیوالو اړیکو کارپوه نجیب الرحمان شمال وايي: « لکه څرنګه چې ټولو ته ښکاره ده، د ایران اسلامي جمهوریت او تاجکستان لیدلوري او مناسبات د افغانستان له اوسني حاکمیت سره متفاوت دي، خو په دوشنبې کې د دواړو هېوادونو د ولسمشرانو په وروستۍ لیدنه کې، هغوی له افغانستان سره د اړیکو پر ټینګښت او ثبات ټینګارکړی. البته له ګاونډیو هېوادونو سره د افغانستان د اړیکو په ګډون د مختلفو هېوادونو ترمنځ د اړیکو او مناسباتو ټینګښت کولی شي نه یوازې د خلکو ترمنځ اړیکې ښې کړي، بلکې سیمه کې د سولې او امنیت د ټینګېدو سبب شي.»
د سیاسي چارو کارپوه محمد زلمی افغانیار وايي: « که زموږ ګاونډیان رایښتیا هم صادق وي، په خپلو خاورو کې جوړ کړي کمپونه او هغه کسان چې د دوی په مدیریت کې دي، باید افغانستان ته واستوي؛ ترڅو ملي ګټو ته په کتو، له یوبل سره کېني او ستونزې حل کړي. د سیاسي او اقتصادي ثبات لرونکی افغانستان کولی شي د نړۍ او په ځانګړې توګه د سیمې په امنیت او اقتصاد کې ښه رول لوبولی شي. زه هیله لرم دوی اجازه ورکړي چې د افغانستان خلک له اوسني حاکمیت سره پر ګډه خپل برخلیک روښانه کړي، نه د هغو ناوړه پروګرامونو پر بنسټ چې د دوی له خوا ورکول کېږي.»
دا په داسې حال کې ده چې له دې وړاندې د ایران ولسمشر په سیمه ییزو مسایلو کې له افغانستان سره د تعامل پر اړتيا د ټېنګار ترڅنګ، په افغانستان کې د شته ستونزو حل او د سولې او ثبات ټینګښت مهم بللی و.
