په اسلام اباد کې د اسلامي امارت چارسمبالي په دې هېواد کې په ځانګړې توګه پلازمېنه اسلام اباد او پنجاب ايالت کې له افغان کډوالو سره د پوليسو ناوړه چلن پخلی کړی.
سردار احمد شکېب په پاکستان کې د کډوالو لپاره د ملګرو ملتونو د کډوالو سترې کمېشنرۍ له ځايي مسوولې سره ليدنه کې ويلي، پاکستاني پوليس د افغانانو پر کورونو په چاپو وهلو سربېره، کډوال نيسي او د پیسو په بدل کې يې بېرته خوشې کوي.
د شکېب په خبره، په نيول شویو کسانو کې د ښځو او ماشومانو په ګډون هغه افغانان هم شامل دي چې وېزې او يا په پاکستان کې د اوسېدلو نور قانوني اسناد لري.
شکېب زیاته کړې:« پولیس د افغان کډوالو د کورونو تلاشي کولو سربېره د ښځو او ماشومانو په ګډون هغه افغان اتباع چې ویزې او قانوني اسناد هم لري، نیسي او په ځینو مواردو کې ترې د بډو او ډېرو پیسو غوښتنه کوي.»
په ورته مهال، د پاکستان لپاره د ملګرو ملتونو د کډوالو سترې کمېشنرۍ (یو.اېن.اېچ.سي.آر) استازې فیلیپا ګراندلر ويلي، له افغان کډوالو سره د پوليسو چلن په اړه شکايتونه ورته رسېدلي او په خبره يې له پاکستاني چارواکو سره پر خبرو بوخته ده، ترڅود ياد چلن درېدل يقيني کړي.
بله خوا په پاکستان کې مېشت افغان کډوال له سرپرست حکومته او نړيوالو غواړي چې هلته يې پر وړاندې پرتې ستونزې حل کړي.
په پاکستان کې افغان کډوال ملک مجاهد شینواری وايي: « موږ له اسلامي امارته وړاندې هم غوښتنه کړې وه چې راشي، په اسلام اباد کې د پاکستان له حکومت او د ملګرو ملتونو له ادارو سره غونډې وکړي، ترڅو د افغان کډوالو د دې ستونزې لپاره یوه حل لاره پيدا شي. دلته د پاکستان په مختلفو ښارونو کې سلګونه زره افغان کډوال کاروبارونه لري.»
د دې تر څنګ، د کډوالو حقونو مدافعان وايي، دا چې پاکستان له سختو سیاسي اقتصادي او امنیتي ګواښونو سره مخ دی، نو زور يې له افغان کډوالو باسي.
دوی له سرپرست حکومته او نړیوالو غوښتنه کوي چې دې ستونزې ته دې د پای ټکی کېږدي.
د کډوالو مدافع عبدالرازق عادل وايي: « له پاکستانه د افغان کډوالو د اخراج یو لوی لامل، له سیاسي، اقتصادي او ټولنیزو فشارونو سرچینه اخلي. له بده مرغه دغه اندېښنې په ګڼو مواردو کې په نژادي او قومي تبعیض پای ته رسېږي او افغانان تر هدف لاندې نیسي.»
دا په داسی حال کې ده چې د کډوالو او بېرته راستنېدونکو چارو وزارت چارواکو د یوي اعلاميې په خپرولو سره ویلي، د چهارشنبې په ورځ د پاکستان له بندخونو۱۴ تنه افغان بندیان چې قانوني اسناد يي نه درلودل، آزاد او خپل هېواد ته راستانه شوې دي.
