د مخابراتو او مالوماتي ټکنالوجۍ وزارت يوه نيمه مياشت وړاندې پرېکړه وکړه چې د ټولو مخابراتي شبکو ترمنځ د غږيزو اړيکو د يوې دقيقې بيه ۱.۳۴ افغانیو او د يو جي.بي انټرنېټ بيه ۹۵ افغانيو ته راټيټه شوې او ډاډ يې ورکړ چې د ۲۰۲۵ کال د جنورۍ له لومړۍ نېټې به د تطبيق وړ وي.
خو اوس د کابل ښار یو شمېر اوسېدونکي وايي، د مخابراتو او مالوماتي ټکنالوجۍ وزارت دغه پرېکړه نه ده عملي کړې او مخابراتي شرکتونه لاهم پر خپل زړه د غږيزو او انټرنېټي کڅوړو بيې ټاکي.
د کابل ښار یو تن اوسېدونکی محمد صفي وايي: « تر اوسه خو موږ کوم بدلون نه دی لیدلی، مطلب دا چې بیې ټیټې شوې یا لوړې شوې وي. نرخونه هماغه دي او ټولې داخلي شبکې ډېر انټرنېټ مصرفوي. کله چې څو جي.بي انټرنېټ فعال کړې او یو څو دقیقې ترې ګټه واخلې، وینې چې ډېر انټرنېټ مصرف شوی وي. زموږ غوښتنه دا ده چې بیې ټیټې او کیفیت لوړ شي.»
د کابل ښار یو بل اوسېدونکی عثمان ساپی وايي: « زه له اتصالات سیمکارټ ګټه اخلم، خو چې پیسې ور واچوم ۱۰ یا ۱۵افغانۍ رانه تاو کړي. کله چې شبکې ته زنګ ووهم او شکایت وکړم، راته وايي په دې باندې خدمات فعال شوي، حال دا چې ما نه وي فعال کړی.»
خو د مخابراتو او مالوماتي ټکنالوژۍ وزارت چارواکي وايي، پرخپلې کړې پرېکړې ولاړ دي او له تطبيق وړاندې يې مخابراتي شرکتونو ته په ټيټه بيه د کڅوړو وړاندې کولو لپاره يوه مياشت مهلت ورکړی و.
د دغه وزارت ویاند عنایتالله الکوزی وايي: « مخابراتي شبکو ته ځانګړی وخت ورکړل شو چې د یوې میاشتې په جریان کې خپل سیسټم ته نوې بیې وټاکي او بیا یې مشترکینو ته وړاندې کړي. د ۲۰۲۵ کال د جنورۍ له لومړۍ نېټې دغه بیې په ټول افغانستان کې پلې شوې دي او هېڅ مخابراتي شبکه نه شي کولی له دې سرغړونه وکړي. مشترکین کولی شي د ستونزې لرو په صورت کې ستاسو له آدرسه او مخامخ د مالوماتي ټکنالوجۍ وزارت ته مراجعه وکړي.»
الکوزی د غږيزو او نټرنېټي کڅوړو د بيو ټيټوالي ترڅنګ د کيفيت لوړوالی هم تایيدوي او وايي، د مخابراتي شرکتونو ترمنځ د سالم رقابت په پایله کې ښايي د يادو کڅوړو بيې له دې هم راټيټې شي.
د مخابراتو او مالوماتي ټکنالوجۍ وزارت ویاند زیاتوي: « د مخابراتو او مالوماتي ټکنالوجۍ وزارت چې تر اوسه کوم طرزالعمل مخابراتي شبکو ته ورکړی او نوي قېمتونه یې اعلان کړي، ټول په خپل وخت سره عملي شوي؛ که دا د سیمکارټونو موضوع ده یا هم د قېمتونو موضوع. اوس هېڅ مخابراتي شبکه نه شي کولی له دې سرغړونه وکړي. که چېرې په دې برخه کې ستونزې راشي، له دوی سره قانوني چلن کېږي او د مخابراتو وزارت ورسره مخامخ خبرې کوي.»
د مخابراتو او مالوماتي ټکنالوجۍ وزارت د مالوماتو له مخې، دا مهال د ټول هېواد پر کچه په هغو سيمو کې چې مخابراتي خدمتونه په کې نه شته او يا هم کمزوري دي، د۵۵۰ نویو مخابراتي سایټونو پر فعالولو کار پيل شوی چې له ډلې يې ۵۴ هغه په ۱۴ ولایتونو فعال او ګټې اخيستنې ته سپارل شوې دي.
