د افغانستان صنعت او سوداګرۍ خونې مرستیال محمد یونس مومند وايي، کراچۍ او یو شمېر نورو بندرونو کې د افغان سوداګرو سوداګریز توکي بندپاتې او په خبره یې د خرابېدو له ګواښ سره مخ دي.
مومند زیاتوي، که زمینه برابره شي او یاد سوداګریز توکي او درمل هېواد ته راوړل شي، ورسره به نرخونه کنټرول شي، د کار کولو زمینه به برابره شي.
مومند وايي: «که چېرې دغه بندرونه خلاص شي او ټول سوداګریز توکي بازار ته راشي، نو زه فکر کوم چې هم به نرخونه کنترول شي او هم به د کار کولو زمینه برابره شي.»
د درملیزو خدمتونو ټولنې مشر اسدالله کاکړ وايي: «په ګودامونو کې ګرمي زیاته وي او دوا خپل کیفیت له لاسه ورکوي، بل دا هغه دوا ده چې د وخت حکومت په موږ راوغوښته او د کورونا وېروس مخنیوي دوا وه او د بازار اړتیا وه، چې موږ دغه دوا ورته عرضه کړو.
متأسفانه امارت هم راسره تر اوسه همکاري نه ده کړې او دا څلورمه میاشت ده چې زموږ دوا په ګودامونو کې پرته ده، خو تیره ورځ خبر شو،چې انلایز یې راغلی او ښایی اجازه ورکړل شي.»
سوداګر دا اندېښنه هم لري چې په دې وروستیو کې یو ځل بیا د دوی د تښتولو هڅې کېږي او له اسلامي امارت غواړي چې د سوداګرو امنیت خوندیتوب ته پاملرنه زیاته کړي.
کاکړ زیاتوي: «تېر حکومت زموږ د ځان او کورنۍ امنیت لپاره د وسلو کارتونه راکړي وو او مرمۍ ضد موټر و، چې سوداګر په کې ګرځېدل، خو د امارت په راتګ سره موږ وسلې او موټر ودرول. موږ اوس بیا اړتیا لرو او اړتیا شته چې وسلې وګرځو ځکه سوداګر تښتول کېږي.»
اخوا د اسلامي امارت مسوولین بیا وايي، له سوداګرو او د نړۍ له یو شمېر هېوادونو سره یې خبرې روانې دي، چې څنګه کېدای شي د سوداګرۍ او ترانزیټ برخه کې شته ستونزې حل او په بندرونو او ګمرکونو کې بند پاتې توکي راوباسي.
