د ناټو یا غوڅ ملاتړ ماموریت پوځي مشرانو د شبنې پر ورځ د « ۱۴۰۰ کال د وږي پر ۲۷ مه» د یونان پلازمېنه اتن کې له افغانستانه سیمې او نړۍ ته د ور پيښو احتمالي ګواښونو د مخنیوي په اړه ناسته وکړه.
ناسته کې پوځي مشرانو په افغانستان کې د ترهګرۍ د ګواښ پیښیدو او پر وړاندې یې پر ګډې مبارزې او عملیاتو بحثونه شوي دي.
د ناټو د پوځي کميټې مشر ادمایرل راب وايي، تر اوسه پورې یې په افغانستان کې د ترهګرۍ پر وړاندې کوم اقدام نه دی کړی،خو خبرداری یې ورکړ، که ګواښ محسوس شي،پوځي عملیات به پیل کړي.
راب زیاته کړه:«اوس مهال د ترهګرۍ پر وړاندې د ناټو عملیات نه دي پیل شوي،خو راتلونکې په اړه څه نه شو ویلی. موږ په ځانګړې توګه اوس څه نه شو ویلی. دا منو،چې اندیښنې شته افغانستان به د ترهګرۍ پر پټنځای بدل شي،خو اوس مو لا ګام نه دی پورته کړی.»
د ناټو غړو هېوادونو دفاع وزیران اوس هم د هغوی پر وړاندې د افغانستان له لوري د ننګونو خبره کوي،خو وايي یوازنۍ لار دا ده،چې اقدام وشي.
د یونان د ملي دفاع کمیټې مسوول جنرال فلوروس وايي:« تر اوسه پورې مو په ناټو کې داسې کوم هوکړه لیک نه دی لاسلیک کړی،چې په افغانستان کې د شته ننګونو پر وړاندې مبارزه پیل کړو. موږ په دې تړاو د پرمختګونو خبره کولای شو،خو د وروستۍ پریکړې په اړه څه نه شو ویلی. خو موږ باید بیداره اوسو.»
په دې ناسته کې د هغو هېوادونو پر ملاتړ هم بحثونه وشول،چې افغان کډوال ور روان دي.
د یونان دفاع وزیر نیکاس پاناجیوټوپولوس وايي:« موږ په افغانستان کې له ننګونو له یوې ډکې دورې تېریږو. په دوی کې د کډوالو موضوع هم شامله ده. هغوی له سختو لارو تېریږي،ترڅو اروپا ته ورسېږي. موږ باید له هغو هېوادونو سره د مرستې او ملاتړ په اړه هم خبرې وکړو،چې دغه کډوال ورځي،ترڅو د کډوالۍ کړکېچ ته رسېدنه وکړی شي.»
د ناټو مشران داسې مهال په افغانستان کې د ترهګرۍ پر وړاندې د مبارزې او عملیاتو خبره کوي،چې په افغانستان کې د امریکا او ناټو سازمان شل کلن پوځي ماموریت د روانې سپټمبر میاشتې په لومړۍ نېټه پاېته رسېدلی او په ټول هېواد اسلامي امارت حاکمیت لري.
