د افغانستان د درملو چوپړتیاوو ټولنې مرستیال ګل حلیم وايي، بازارونو کې درمل شته، خو د بانکونو له تړل کېدو سره واردات کم شوي او که بهر ته د پيسو لېږد پیل نه شي، لیرې نده، چې هېواد به د درملو له کمښت سره مخ شي.
هغه زیاتوي:« د هېواد په بازارونو کي کافي درمل شته، خو اساسي ستونزه دا ده، که بانکو خلاص نه شي او واردات شروع نه شي درمل به نور هم کم شي.»
د درملو چوپړتیاوو ټولنه پر اسلامي امارت غږ کوي، چې بانکي سیستم خلاص کړي، ترڅو د نورو ودارداتو لپاره بهر ته پيسې ولېږدوي.
اخوا یو شمیر درمل پلورونکي بیا وايي، ځنې درمل ورسره خلاص شوي او اندېښنه لري، که له بهر یې وارد نه کړي، په څو ورځو کې به ورسره شته درمل هم نه وي.
یوتن درمل پلورونکی وايي:«په هېواد اوس مهال د ځینو درملو له کمښت سره مخ یو، ځکه موږ نه شو کولای چي پیسې ولېږدوو ترڅو تازه درمل هېواد ته راوړو.»
افغانستان د درملو برخه کې هم یو ستر مصرفي هېواد دی، چې ډېری درمل له پاکستان، هند، ایران او ترکیې هېوادونو واردوي، چې د بانکي نظام او بانکي خدمتونو د محدودیتونو سره بهر ته د پيسو لېږد درېدلی او له همدې کبله هېواد ته د درملو واردات درېدلي دي.