پکتیا:یو شمیر بې سرپرسته  مېرمنېو،چې ماشومان یې له لوږې کړیږي د ځان وژنې هڅه کړې

د پکتیا ولایت  مرکز ګردیز ښار ته دا بې سپرسته مېرمنې،چې هره یوه یې د ژوند ترخې کیسې لري، یوه خیریه بنسټ ته د مرستې غوښتنې لپاره راغلي، وايي، ماشومان یې له لوږې کړیږي  او له همدې امله یې د  ځان وژنې هڅې کړي. 

دوی د هغه لسګونه ښځو له ډلې دي،چې د کورنیو سرپرستان ترې جګړو اخېستي او تر ورځو ورځو ماشومانو ته خواړه نه شي برابرولی .

پکتیا کې یوه بې وزله میرمن وايي:«د الله په هیله ناست یو. ماشومان مې ژاړي، نجونې مې د سوال لپاره د خلکو کورونو ته ځي،خو ډېر کله څوک څه نه ورکوي. یوه لور مې سپي وداړله، د  ورځو ورځو د خوړو لپاره څه نه لرو.»

یوه بله میرمن چې د څلورو لوڼو سرپرستي ور پر غاړه ده ، خاوند او نارینه او اولاد نه لري وایي، نور یې د خپلو لوڼو لوږه ونه شوه زغملی او څو ورځې وړاندې یې د ځان وژنې هڅه وکړه،خو په خبره یې  وژغول شوه .

 هغې زیاته کړه:« پرون مې ماشومانو نه پریښودم.ډوډۍ یې غوښته،څه مو نه لرل اړه شوم، د موږکانو دوا مې  وخوړه. د ماشومانو ژړاګانو کلیوال خبر کړل، هغوی روغتون ته یووړم او وژغورل شوم.»

خان وزیر،چې د ۱۱ کسیزې کورنۍ سرپرست او د زړه ناروغي لري وایي، د ډیر پور تر څنګ یې د خپلې درملنې او د کورنۍ غړو د ژوندي ساتلو لپاره یې د کوچنۍ لور د پلورلو پریکړه کړې.

 خان وزیر زیاتوي:« پوروړی یم.د زړه ناروغي لرم.کورنۍ مې له لوږې سره مخ ده، اوس مو پریکړه کړې،چې یوه کوچنۍ لور وپلورم.»

له دا ډول بې وزله کورنیو سره حماس خیریه بنسټ هره میاشت نقدي او د خوراکي توکو مرسته کوي، خو مسوولین یې وایي، د بد اقتصادي وضعیت له کبله له بنسټ سره د مرسته کوونکو شمیر کم شوی دی 

د حماس خیریه بنسټ مشر عبدالهادي حماس وايي:« د وروستي بد اقتصادي وضعیت له کبله د هغو کسانو شمیر کم شوی دی،چې د زموږ د بنسټ له لارې له بې وزلو سره د خوراکي توکو، پوهنې او روغتیا برخو کې مرسته کوي.اوس زموږ تمرکز یوازې پر خوراکي توکو دی،خلک له لوږې سره مخ دي.»

ګردیز کې دغه کورنۍ چې ماشومان یې له لوږې کړیږي ، له اسلامي امارت، مرستندویه بنسټونو او ملي سوداګرو د خوراکي توکو د مرستې غوښتنه کوي.