په هېواد کې له يوې مياشتې زياته موده کېږي،چې د بانکوالۍ سيستم له خنډ او ځنډ سره مخ دی او خلک ساعتونه ساعتونه د خپلو پېسو د اېستلو لپاره انتظار کوي.
د بانک مخې، یو شمېر پېردونکي شکايت لري،ځينې کسان،چې له ساتونکو او یا د بانک له کارونکو سره پېژندګلو لري،په اسانۍ سره خپلې پېسې وباسي، خو په خبره یې نور کسان د خپلو پېسو لپاره سخت کړاونه وباسي.
د کابل ښار یو تن اوسېدونکی وايي:« پېسې مې په سختۍ سره ټولې کړې او بيا مې بانک کې جمع کړې، اوس هغه کسان،چې څوک وپېژني،په اسانۍ سره خپلې پېسې اخلي، خو موږ نشو کولی. »
ځينې بيا ادعا لري،چې آن د شپې له خوا د بانک مخې ته ورغلي،خو نه دي بريالي شوي چې په کتار کې ځان ته ځای پېدا کړي او پېسې ترلاسه کړي.
لويه ستونزه د زياترو څانګو او د صرافيو اتومات ماشينونو بندوالی دی.
د کابل ښار یو تن اوسېدونکی وايي:« ويل مرکزي بانک ته ورشئ، درې بجې مې د شپې مرکزي بانک کې کارت جمع کړ،خو بیا هم نوبت رانه غی.وايي سبا راشه، بل سبا راشه.»
د نوي حکومت د پرېکړې له مخې،هره اوونۍ پېرېدونکي شل زره افغانۍ يا دوه سوه ډالر له خپلو حسابونو اېستلی شي.
ګڼو خلکو سره د پېسو درک نشته او داسې کسان هم لېدل کېږي،چې د درملو پېسې نلري،خو بانکونو کې يې پانګه بنده ده.
د کابل ښار یو تن اوسېدونکی وايي:« ډېرو ته ناروغان پراته دي،څوک د ډوډۍ پېسې نه لري،خو دوی د خلکو خپلې پېسې نه ورکوي. دا کوم حالت شو. موږ له خصوصي بانکونو داسې تمه نه درلوده.»
د بانکوالۍ سېستم کې د خلکو ستونزې زياتې جدي ګڼل کېږي،خو د بانک کاروکونکي او ساتونکي اجازه نه ورکوي،چې خبريالان له دې جريانه خبرونه جوړ کړي.