د لوګر د هغه دوه شپیته کلن  کس کیسه،چې دوه زامن یې جګړه کې وژل شوي 

ګل آغا د لوګر مرکز پل علم  بابوسو سېمې اوسېدونکی دی،هغه وایي،  شااوخوا دری میاشتې وړاندې یې کرونده کې پر کار بوخت وه،چې جګړه ونښته او دوه زامن یې ځای پر ځای په کې ووژل شول. 

په ورته وخت کې هغه وايي، له دې پېښې څو و ورځې  وروسته یې بل زوی هم ټپي شو.

ګل اغا وايي:« کرونده  کې پر کار بوخت وو،چې سېمه کې د طالبانو او دولتي ځواکونو تر منځ جګړه رامنځته شوه. دې جګړه کې مې  دوه زامن ځای پر ځای مړه شول او څه موده وروسته مې یوازنی زوی هم جګړه کې ټپي شو.»

ګل اغا ته اوس د شپږ کسیزې کورنۍ سرپرستي ور پر غاړه ده، هغه وايي، اړ دی،چې د خپلې کورنۍ لپاره کار وکړي.

نوموړي وايي، ګردیز کې دغه هوټل کې د میاشتې په ۴۰۰۰ افغانۍ کار کوي. 

 ګل اغا  زیاتوي:«د لوګر مرکز پل علم بابوسو سیمې اوسیدونکی یم. د دوو لمسیانو، اینګور، میرمنې او د ټپي زوی سرپرستي را پر غاړه ده. زه  اړ یم،چې کار وکړم.»

ګل اغا وايي، مرکزګردیز کې په یوه هوټل کې د میاشتې پر ۴ زره افغانۍ کار کوي، او په خبره یې  د کار یې  لا میاشت نه ده پوره شوې او انتظار دی،.چې معاش واخلي او کورنۍ ته یې ولېږي. 

 هغه وايي:« نن مې دلته د کار شلمه ورځ ده. زما په دا څلور زره افغانیو هېڅ ګوزاره نه کېږي.زه په دې پیسو اوړه واخلم، غوړي واخلم، بوره واخلم،کچالو واخلم،څه پرې واخلم.»

ګل اغا وایي، کورنۍ یې له لوږې کړیږي او د اسلامي امارت مسوولین، مرستندویه بنسټونه او ملي سوداګرو دې ور سره د خوراکي توکو مرسته وکړي.