د عبدالله ابن مبارک دیني جامعې له درېیمې دورې نږدې څلورنیم سوه تنه فارغ او د فضیلت پګړۍ یې وتړلې.
د دستار بندۍ دغو مراسمو کې دیني عالمانو او چارواکو د علم د زده کړې په ارزښت خبرې وکړې.
دیني عالم شیخ عزیز الله مظهري د غونډې ګډونوالو ته وویل، عصري علوم مباح نه، بلکې فرض کفايي دي او انساني ژوند دغو علومو پورې تړلی دی.
هغه زیاته کړه: «د طب علم فرض کفايي دی، د نجارۍ علم، د خټګرۍ علم، معماري، صنایع او نور ټول فرض دي؛ ځکه چې د انسان ژوند په دې پورې اړه لري. انسان مدني الطبع دی، اجتماعي ژوند کوي او اجتماع له دې پرته نه شي کېدای. چې معمار نه وي، دا ودانۍ به څنګه جوړېږي، اوس به موږ په واورو کې جلسه کوله. که مستریان نه وای، دا موټر به څنګه کېدل، چې کرنه او زراعت نه وي، ژوند به څنګه مخکې ځي، چې اقتصاد نه وي ژوند نه شي کېدای. نو، دا عصري علوم او د هغو زده کول فرض کفايي دي؛ دا مباح نه دي بلکې فرض کفايي دي، فرض دي فرض.»
د بهرنیو چارو وزارت سیاسي معین شېر محمد عباس ستانکزی وايي: «کوشش وکړئ چې علم زده کړئ، علم یوازې دیني نه دی بلکې دنیايي علم هم زده کړئ. طیاره به څوک الوزوي، توپ به څوک جوړوي، راکېټونه به څوک جوړوي چې یو بل ځای پرې وولئ. کاش چې موږ پرون قاره پیما راکېټونه درلودی، خپل زړه به مو پرې یخ کړی و، خو افسوس چې نه یې لرو. ولې یې نه لرو؟ ځکه چې موږ دا علم نه دی کړی.»
دیني علما دغه راز وايي، په اوسنیو شرایطو کې په افغانستان کې داسې مجتهد او متبحر عالم نه شته چې د مسایلو په تړاو یې خبره وروستۍ او ټولو ته د منلو وړ وي.
مظهري زیاتوي، د همدې تشې له امله لاهم د دیني علماوو ترمنځ په ځینو مسایلو کې اختلاف شته دی.
په ورته وخت کې د بهرنیو چارو وزارت سیاسي معین وايي، اسلام دین دومره تنګ نظره هم نه دی لکه څنګه چې یې ځینې ملګري په اړه فکر کوي.
شېر محمد عباس ستانکزی زیاتوي: « اسلام دومره پراخ بنسټه هم نه دی لکه غربیان یې چې تحلیلوي چې باید دا رقم نظام په افغانستان کې راشي. خو بله خوا دومره تنګ نظره هم نه دی لکه زموږ بعضې ملګرو سره چې دومره تنګ نظره دي چې په هېڅ صورت له ځان پرته بل څوک په اسلام کې نه ویني. اسلام هغه دین دی چې ۱ زر ۴۰۰ کاله مخکې الله تعالی موږ ته راولېږه او د قیامت تر ورځې به د ټول بشریت لپاره د حل لاره وي. د هر وخت او هر زمان، هر تخنیک او هر ساینس او پیشرفت سره مطابق جوړ دی؛ په دې کې ګوتې وهل نه شته.»
د بهرنیو چارو وزارت سیاسي معین دغه راز وايي، که نظام نه وي نو شریعت نه شي پلی کولی او ټول د نظام په ساتنه ملکف دي؛ خو نظامونه په اقتصادي پرمختګ او اړوندو علومو پر زده کړې ساتل کېږي.
