خلیلزاد: په ناڅاپي توګه له افغانستان د اشرف غني وتل لامل شول، چې د واک لېږد بهیر ګډوډ کړي

افغانستان کې د سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي، د افغانستان د مخکیني ولسمشر اشرف غني بې پلانه وتل لامل شول، چې په سوله ایز ډول د واک لېږد بهیر ګډوډ کړي.

خلیلزاد په افغانستان کې د روان بد وضعیت پړه پر افغانانو اچولې او په ځانګړې توګه یې مخکینی ولسمشر اشرف غني پړ بللی دی.

نوموړي د تېر افغان حکومت د سقوط ملامتي پر اشرف غني اچولې، چې په خبره یې له هېواده وتل یې لامل شو، چې د واک د لېږد طرحه او کابل ته د طالبانو د نه داخلېدو بهیر له ناکامۍ سره مخ شي.

خلیلزاد دا هم ویلي، چې افغان لوري مذاکرې ته حاضر نه شول، بالاخره یوه لوري سقوط وکړ، چې امریکا او د امریکا د ځانګړي استازي په توګه د هغه مسولیت ندی.