دوی وايي،تورې جامې د افغان ښځو دودیزې جامې او حجاب نه دی او په وینا یې د افغانستان ښځې ځانګړې دودیزې جامې او حجاب لري او تور پور کوي،چې دا ډول جامې له بهره تحمیل شوي هغه دي.
دغه راز دوی پر خواله رسنیو خپل هغه انځورونه خپاره کړي،چې دوی په کې د افغانستان دودیزې جامې اغوست او همدا د افغانانو اصلي جامې او حجاب بولي.
د ښځو حقونو فعاله ماریا توتاخېل وايي:« تاسو که متحده عرب امارات یا بل هر چېرته لاړې شئ،تاسې به له یو متر څخه زیات څادر ونه ګورئ. خو دلته په افغانستان کې هغه لږ یې دوه نیم متره اټکل شوی دی. نو چېرته چې د هغوی فرهنګ دومره دروند وي او د حجاب یوه برخه وي، نو په هغوی یو نوی شی تحمیل کول به د هغوی په حق کې ظلم واوسي. د افغانستان میرمنو په بېلا بېلو هېوادونو کې خپل فرهنګ ساتلی او ښه استازولي یې کړې ده.»
د ښځو حقونو یوه بله فعاله سحر ساحل بیا وايي:« دا تور لباس د افغانستان خپلې جامې نه دي. دا د چادرې په څیر چې مخکې کلونو کې پر افغان میرمنو تحمیل شوې وې، دا جامې هم تحمیل شوي دي. نه پوهېږم،چې له کوم هېواد څخه وارد شوې دي،خو له خارجه وارد شوي دي.»
افغان ښځې ادعا کوې،چې تور حجاب په افغانستان کې بیخي نوی دی او د هېواد په هیڅ سیمه کې ښځې دا ډول جامې نه اغوندي.
بل خو بیا دیني عالمان وایي، په اسلام کې د مخ او لاسونو پټول د عورت برخه نه،بلکې د حجاب یوه برخه ده،چې مراعتول او نه مراعتول یې ستونزه نه لري، خو ټینګار کوي که مراعت شي غوره به وي.
دوی وایي، افغانستان د ښځو لپاره ځانګړی حجاب لري،چې هغه بورقه ده او تر پردیو تورو حجابونو مناسبه ده.
مفتي عبدالاحد خاکسار وايي:«په درېیم قسم حجاب کې فقها نرمي کوي او وایي، د هر هېواد کلتور پسې تړلې ده،چې په هره طریقه د هغوی حجاب راځي.لکه زموږ بورقه ده. دا هم زموږ د هېواد کلتور دی او حجاب کیدلی شي،ځکه ټوله ښځه په کې پټه وي. حجاب باید داسې وي،چې ښځو ته تکلیف نه وي.»
دوی دا خبرې وروسته له هغې کوي،چې په څو ورځې وړاندې کابل او ولایتونو کې سلګونه ښځو چې سر تر پښو یې تورې جامې اغوستې وې،د اسلامي امارت پر ملاتړ یې لاریونونه وکړل او هغه ښځې یې وغندلې،چې په ښکاره موخونو ښار ته راوتلې وې او له نوي حکومت نه یې د خپلو حقونو او دندې غوښتنه کوله.
