د ژمي په رارسېدو سره د نورو ښارونو په څېر هرکال کابل ښار کې هم د یخني ښوروا پلورونکو کاروبار ښه وي.
د ژمي سهار، خلک د معمول په څېر ښار ته په خپلو ورځنیو چارو پسې ځي. شهاب الدین هم د نورو په څېر سهار شپږ بجې ښار ته ځي او یخني ښورا پلوري.
د نورو ورځو پرتله پرې ګڼه ګوڼه زیاته ده، ځکه هوا سړه ده او خلک د یخني ښوروا څښلو ته راغلي دي.
شهاب الدین چې له نږدې شپږو کلونو راهیسې چې یخني ښوروا پلوري، خوښ دی او وايي د ژمي په موسم کې یې کاروبار ښه وي او هره ورځ نږدې دوه دېګه د کورنيو چرګانو د غوښې یخني ښوروا پلوري.
شهاب الدین وايي: « یخني همدلته جوړوم او شکر دی خلک ډېر راځي، بیروبار دی. د یخني موادو کې د چرګ غوښه، شغلم، پیاز، نارنج، ګشنیز، تور مرچ، مالګه، زرد چوبه او یو شمېر نورې مسالې دي چې په دېګ کې یې اچوو.»
کمال خان کاکا چې له موسمي ناروغیو کړیږي وايي، یخني ښوروا ورته ګټه وره ده او د څښلو لپاره یې دلته راغلی.
هغه په دې اړه وايي: « یخني ښه ده، ځکه چې هوا خرابه ده او خلک پلاسټیکونه سوځوي او له امله یې زموږ په څېر خلکو سینې ته زیان رسېږي. له همدې امله یخني خورم ترڅو سینه مې خلاصه کړي.»
د کابل ښار یو بل اوسېدونکی ننګیالی وايي: « زه دلته راځم چې یخني وخورم. هوا یخه او ککړه ده او له امله یې ټوخېږم. هروخت دلته راځم او یخني خورم او بیا مې سینه نرمه وي.»
د کابل اوسېدونکی محمد قیام وايي: « وروره! هوا ډېره خرابه ده او په دې یخني څښلو سره سینه پاکه ساتل کېږي او روغتیا ته ګټه لري.»
یخني ښوروا له هغو خوړو ده چې د ژمي په موسم کې ترې زیاته ګټه اخیستل کېږي. له دې ښوروا هغه خلک زیاته ګټه اخلي چې په موسمي ناروغیو اخته وي.
