د سیاسي چارو شنونکی هدایت الله شینوار ټېڼګار کوي،چې دغه مرستې دې په شفافه او عادلانه توګه د اسلامي امارت له خوا ووېشل شي.
شینوار وايي، له افغانستان سره د نړۍ کېدونکې مرستې باید مشروطې نه، بلکې د بشرپالنې پر بنسټ او بلا عوضه وي.
شینواری زیاتوي:« ټولې مرستې باید د افغان حکومت له خوا ولګول شي. د نړیوالې ټولنې مرستې باید د بشرپالنې پر بنسټ وي، نه مشروطې. د درېیم لوري هر ډول ښکیلتیا به مسله پېچلې کړي او د ډېر فساد لامل به شي. افغان حکومت باید د مرسته شویو پیسو د وېش یوازینۍ سرچینه وي.»
بل پلو د اسلامي امارت د بهرنیو چارو سرپرست وزیر امیر خان متقي د ملګرو ملتونو له یوه استازي فلیپو ګراندي سره لیدنه کې ویلي، حکومت یې چمتو دی،چې د ژمي تر را رسېدو وړاندې په هېواد کې دننه ټولې بې ځایه شوې کورنۍ خپلو، مېنو ته ستنې کړي او په همدې برخه کې د نړیوالو له لوري کېدونکي مرستې هغوی ته ورسوي.
متقي زیاتوي:«د افغانستان اسلامي امارت د ټولو افغان کډوالو له بېرته راتګ هرکلی کوي او له هغوی سره هر ډول مرستو ته چمتو دی.»
لا مالومه نه ده،چې دغه مرستې به کله تر افغانستان رسېږي،خو د جینوا غونډې ګډونوالو د بشري مرستو په ژر تر ژره رسولو ټینګار کړی دی او له طالبانو یې غوښتي،چې د مرستندویه ډلو امنیت دې خوندي کړي.
