ایراني رسنیو د دې هېواد د اوبو مدیریت ادارې د مسوولانو له خولې راپور ورکړی چې د افغانستان له خوا په هریرود سیند د بندونو جوړول به په ایران کې د میلیونونو خلکو څښاک اوبو او کرنیزو ځمکو ته جدي زیان ورسوي.
دوی وايي، د افغانستان سرپرست حکومت په عرفي حقونو کې یو اړخیز ګام پورته کړی او دغه اقدام به د دواړو خواوو کرنې او روغتیا ته جدي ګواښونه پېښ کړي.
دغه راز دوی زیاته کړې، په دې اړه یې د ستونزو هوارولو لپاره رسمي غوښتنې کړې او پر هریرود سیند د بندونو جوړولو ناوړه پایلې یې له افغان حکومت سره شریکې کړې دي.
د ایران د اوبو مدیریت ادارې ویاند عیسی بزرګ زاده ویلي:« دغه اقدام یو اړخیزه دی او د دې یو اړخیز اقدام اغېزې د څو میلیونو خلکو د څښاک اوبو او روغتیا برخې ته زیان رسوي او هم به پر چاپېریال پراخې ناوړه اغېزې ولري. په هریرود سیند د پاشدان بند جوړل به د طبیعي اوبو جریان کم کړي او په کرنیزو سیمو او د مشهد ښار د څښاک اوبو پر زېرمو به جدي اغېز وکړي.»
بزرګ زاده دغه راز زیاته کړې، ایران به له هریرود سیند د حق آبې او په دې سیند د سلما او پاشدان بند جوړولو په اړه له افغان چارواکو سره خبرې وکړي.
له دې سره، د اوبو او انرژۍ وزارت چارواکي د ګاونډیو هېوادونو ورته اندېښنو ته په ځواب کې وايي، یاد هېوادونه باید د افغانستان د اوبو په تړاوو هر ډول اندېښنې له افغان حکومت سره شریکې کړي؛ ترڅو معقول ځواب تر لاسه کړي.
د اوبو او انرژۍ وزارت مرستیال مجیب الرحمن عمر اخندزاده وايي: « موږ له خپلو ګاونډیو هېوادونو یوه احترامانه غوښتنه لرو. غوښتنه مو دا ده چې په میډیا کې د خپلو اندېښنو بیانولو پر ځای، له موږ سره مخامخ اړیکه ونیسي، ترڅو موږ د دوی حقه حقونه وروسپارو. موږ دا بندونه د دې لپاره نه جوړوو چې ګاونډیو هېوادونو ته ستونزې جوړې شي، بلکې موږ خپلې اوبه د دې لپاره مدیریت کوو چې د خپلو خلکو حق یې ګڼو، نه د ستونزو جوړولو لپاره.»
په ورته مهال، د اوبو او انرژۍ وزارت سرپرست ملا عبداللطیف منصورد شاه او عروس بند پرانیستغونډې کې د وینا پرمهال ویلي، د پاشدان، سلما، کمال خان او یو شمېر نورو بندونو په رغونه جدي کار روان دی او له بشپړېدو سره سم به یې ګټه اخیستې ته وسپاري.
منصور زیاته کړې:« که په لنډ ډول ووایو، وګورئ موږ ته د شاه او عروس بند، د کمال خان بند او د پاشدان بند ډېر غټ حیاتي بندونه دي. همدارنګه شاهي کانال، د کونړ له سیند ګمبېرې دښتې ته د اوبو رابېلول، ډېر مهم دي.»
د هرات له مرکز څخه ۲۵ کیلومټره لرې په ختیځه کرخ ولسوالۍ کې د پاشدان اوبو بند ۴۵ زره متر مکعب اوبه زېرمه کولی شي.
د دې بند د جوړولو کارونه په ۱۳۹۰ کال پیل شول خو د بېلابېلا ستونزو له امله بشپړ نه شول.
اسلامي امارت د دې بند کارونو د ۸۰ سلنه بشپړیدو خبر ورکوي او وايي، پاتې کارونه به یې ډېر ژر بشپړ شي.
