ملګرو ملتونو په شمال او شمال ختیځو ولایتونو کې له حرفوي زده کړو وروسته سلګونه ښځو ته د وړو کاروبارونو پيلولو وسايل وېشلي.
د دې سازمان د کډوالو چارو سترې کمېشنرۍ مسوولین وايي، د ياد پروګرام موخه د کورنيو بې ځایه شویو لاسنيوی او د کورنیو اقتصادي پیاوړتیا ده.
ډېری دا ښځې له خپلو مېنو بې ځایه شوې او له ګڼو اقتصادي ستونزو سره مخامخ دي.
اوس د نويو مهارتونو او کاري وسايلو په ترلاسه کولو هيله منې شوې چې د خپلو کورنيو اقتصادي ستونزو په کمولو کې به مرسته وکړای شي.
له حرفوي زده کړو فارغه زرلښته وايي: «موږ ډېر پرمختګ کړی، خیاطي مو زده کړې او غواړو کورته لاړ شو او خیاطي وکړو، هغه تیکې خرڅې کړو او نورې تیکې واخلو او د خیاطۍ کاروبار پيل کړو. په دې سره به زموږ د ژوند ګوزاره وشي.»
له حرفوي زده کړو فارغه زرغونه بیا وايي: « پنځه میاشتې کېږي چې دلته د خیاطۍ کارونه زده کوم. ما اوس کار زده کړی او خیاطه شوم. له دې ځایه چې لاړم، خیاطي پیلوم او خرڅوم یې او په دې به ګوزاره کوم.»
د ملګرو ملتونو کډوالو سترې کمېشنرۍ له لوري له بې ځايه شویو کورنيو سره د مرستې لپاره د حرفوي زده کړو دغه کورس د ۷۰۰ تنو ښځو لپاره شپږ مياشتې وړاندې پیل شوی و او ګډونوالو ته يې د جامو ګنډلو، غالۍ اوبدلو، لاسي صنایعو او د شاتو مچیو په پالنه کې نوي مهارتونه ښودل شوې دي.
د کډوالو په چارو کې د ملګرو ملتونو سترې کمېشنرۍ ساحوي مسوول ذبیح الله اڅکزی وايي: « د دې پروګرام وخت شپږ میاشتې و. دغو ښځو وکولی شول د شپږو میاشتو په اوږدو کې هغه حرفې زده کړې چې مخکې مې تاسو ته وویل. ټول هغه وسایل او مواد چې د دغو حرفو د تمرین لپاره ورته اړتیا وه، دوی ته وېشل شوې دي. په دې کې خام مواد، تار، ګراف او نور توکي شامل دي. دا ښځې نن له یاد شپږ میاشتني کورس فارغې شوې.»
دغه پروګرام له بلخ ولايت سربېره بدخشان، کندوز، تخار، بغلان، سمنګان، جوزجان او فارياب ولايتونو کې هم پلی شوى او سلګونه ښځې له روزنيزو پروګرامونو او کاري وسايلو برخمنې شوې دي.
