د معاملاتو د لارښوونې یو دفتر مشر فتح محمد وايي: «د تعمیراتي او کرنيزو ځمکو او استوګنې کورونو بیې د پخوا پرتله په بې ساري ډول راټيټ شوې دي. څوک يې د اخيستو توان نه لري، ځکه چې بازار کې چاسره پيسې نه شته دي.»
د معاملاتو د لارښوونې برخې کار کوونکي وايي، د ځمکو او کورونو د پلورونکو په پرتله د پېرېدونکو شمېر کم شوی او زياتوي، ځيني خلک ان په ورځو ورځو انتظار باسي، خو ځمکه او کور يې نه پلورل کېږي.
د معاملاتو د لارښوونې دفتر مشر عبداللطیف وايي: «هره ورځ تر پنځو يا شپږو کسانو پورې یوازې زما رهنما ته مراجعه کوي او وايي، حويلۍ مې راته خرڅه کړه؛ خو متاسفانه پېرېدونکي نه شته دي.»
له دې سره د بلخ اوسېدونکې پر نړيوالې ټولنې او مرستندويه بنسټونو غږ کوي چې افغانستان سره دې خپلې مرستې جاري وساتي.
د مزارشریف اوسېدونکی بريالی وايي: «زموږ غوښتنه دا ده چې خلکو ته دې کاروبار پيدا کړي. پروژې دې پلي شي او هغه د نيمګړو پروژو چارې دې بيا پیل شي.»
د مزارشریف اوسېدونکی محمد نظر وايي: «زموږ له هغو دولتونو هېله دا ده چې د پخوا په څېر افغانانو سره خپلې مرستې جاري وساتي او تر څنګ يې مسوولين بايد خلکو ته د کاروبار پيدا کېدو زمينه برابره کړي.»
د پخواني حکومت له سقوط وروسته خلک له رامنځته شوي ډاډمن امنيتي وضعيت څخه خوشاله دي، خو بيکاري، فقر او اقتصادي ننګونې لا هم له جدي ستونزو څخه شمېرل کېږي.