د سیاسي چارو شنونکی عزیز معارج وايي:« اوسنی حکومت یا طالبان اوس نړیوال په رسمیت نه پیژني او که نړیوال له افغانانو سره مرستې هم کوي، مخامخ د حکومت له لارې به نه وي،بلکې درېیم هېواد له لارې به په افغانستان کې لګول کېږي،چې دا به د افغانستان د حیثیت لپاره ښه نه وي. پکار داده،چې طالبان باید ژر تر ژره خپله بهرنۍ پالیسي او سیاست روښانه کړي او بهرنیو هیوادونو سره خپلې اړیکې جوړې او د رسمیت پیژندنې مسله یې حل شي.»
د اسلامي امارت مسوولین هم پر نړیوالې ټولنې غږ کوي،چې د افغانستان روان وضعیت په درک کولو سره افغانان هېر نه کړي او له اقتصادي ناورین دې یې وژغوري.
اسلامي امارت وايي، له افغانانوسره د نړۍ هرډول مرستې مثبتې پایلې لرلای شي او دا کار به د افغانستان او نړۍ ترمنځ رامنځ ته شوی واټن هم له منځه یوسي.
داسلامي امارت د مطبوعاتي ټیم غړی عبدالحق حماد وايي:« نړیواله ټولنه باید افغانستان هېر نه کړي،ځکه د دوی د ناکامو پالیسو په پایله کې دافغانستان موضوع بحراني حالته ورسیده او افغانان دیوډول اقتصادي رکود سره مخ دي او اوسنیو شرایطو کې له افغان ولس سره مرسته مثبت ګام دی او هیله داده چې دغه مرستې ددې لامل شي چې افغانستان او نړۍ یوځل بیا سره وتړل شي.»
جینوا ناسته داسې مهال ترسره کېږي،چې په افغانستان کې د وروستۍ سختې جګړې، کډوالۍ او سیاسي تحول له امله ۱۸ میلیونه افغانان بېړنیو بشري مرستو ته اړتیا لري او تمه ده په دې مهمه ناسته کې ځینې هېوادونه او نړیوال مرستندویه سازمانونه سلګونه میلیونه ډالر مرسته اعلان کړي.