د قطر لومړي وزیر مرستیال او د بهرنیو چارو وزیر ارګ کې د طالبانو کابینې مشر او وزیرانو سره لېدلي دي.
د بهرنیو چارو چارسمبالي وزیر امیر خان متقي کابل ته د قطر دولتي پلاوی سفر مهم بللی او ویلي یې دي، چې دواړو خواوو پر دوه اړخېزو اړیکو او وروستیو تحولاتو باندې خبرې کړي دي.
متقي زیاتوي:« په افغانستان کې وروستیو تحولاتو او نړیوالو غبرګونو په چلن خبرې وشوې. دواړو لورو هېله وښووله،چې په نږدې راتلونکې کې به نړیوالو سره اړیکې نورې هم وغوړیږي او خصوصا قطر هېواد به افغانستان سره ښې دوستانه اړیکې ساتي، خلاصه ښه سفر او ښه مجلس و.»
د قطر پلاوي پخواني ولسمشر حامد کرزي او د ملي روغې جوړې عالي شورا مشر ډاکټر عبدالله عبدالله سره هم لیدلي دي. په دې لیدنه کې هم په سیاسې بهیر خبرې شوي دي.
د اسلامي امارات د واکمنۍ پرمهال دا د قطر لوړ رتبه پلاوی دی،چې په لومړي ځل له کابل څخه لیدنه کوي.
اخوا د سیاسي چارو تحلیل کوونکي وایي، قطر کولای شي،د سیاسي کشالو په حل کې مهم رول ولوبوي، هغه که د طالبانو په منځ او یاهم د نورو نړیوالو قوتونو ترمنځ وي.
د سیاسي چارو تحلیل کوونکی شېر حسن حسن وايي:« درې هېوادونه چې قطر،عربي امارات او پاکستان دي،له طالبانو سره ښیې اړیکې لري. قطر د هوایي ډګر د چارو سمبالولو لپآره هم ژمنه کړې، تخنیکي ټیمونه یې راغلي دي او نورې هغه سیاسي کشالې چې ښايي د طالبانو په خپل منځ کې سره موجودې وي او یا داچې د نورو نړیوالو قوتونو سره د اړیکو د تامین لپاره قطر ښه رول لوبولی شي.»
نړۍ او سیمه په دې فکر کوي،چې د طالبانو حکومت په رسمیت وپېژني او کنه؟
خو د سیاسي چارو تحلیل کوونکي وايي، اوس کوښښونه روان دي،چې د نورو هېوادونو مشران هم له کابله لیدنه وکړي.
د قطري او طالبانو پلاوو ترمنځ د سیمې په ثبات هم خبرې شوي دي.
د پوهنتون استاد محمد ځلاند وايي:« د سیمې د ثبات لپاره امنیتي ستونزو په مخنیوي باندې بحثونه شوي دي، په دې برخه کې کوښښ روان دی،چې د نورو هېوادونو مشران هم راشي او اسلامي امارت سره به لیدنې ولري.»
قطر د طالبانو کوربه هېواد،چې د امریکا او طالبانو ترمنځ د سولې توافق په کې لاسلیک شو،خو بین الافغاني مذاکرات ناکام وو. اوس شنونکي ټینګار کوي،چې نړۍ باید له افغانانو سره مرستې وکړي،ترڅو اقتصادي بحران افغانستان کې پای ته ورسیږي.
