د طالبانو له لوري د واک له ترلاسه کولو وروسته د چین، پاکستان او هند په ګډون د سیمې او نړۍ هېوادونه د افغانستان په تړاو پریکړه کوي.
د امریکا د بهرنیو چارو وزیر انتوني بلینکن په افغانستان او سیمه کې د روان او راتلونکي وضعیت په تړاو له شلو هېوادونو سره ناسته کې پر احتمالي ګواښونو، ننګونو او شته اندېنښو بحثونه وکړل او ټولو هېوادونو په خپل وار غونډه کې خپلې اندېښنې شریکې کړې.
ناسته کې د پاکستان استازي بهرنیو چارو وزیر شاه محمود قریشي ویلي، هېواد یې نه غواړي افغانستان منزوي شي او په وینا یې د دې کار د مخینوي لپاره باید نړۍ ورسره خپلې اړیکې پرې نه کړي.
قریشي زیاتوي:« زما په اند، غوره خبره دا ده،چې افغانستان سره اړیکې پر خپل حال پاتې شي،ځکه انزوا ته وړل یې د هېچا پر ګټه نه دي، انزوا ته وړل یوازې او یوازې بدې پایلې درلودای شي او هغه موږ نه غواړو. دا کار نه د افغانستان او نه د سیمې لپاره غوره ثابت کېدی شي.»
بل لور ته هند هم د استرالیا په ګډون له یو شمیر هېوادونو سره په ناسته کې اندېښنه ښودلې ده،چې د طالبانو واکمني به نورو ترهګرو ډلو ته لار پرانیزي،چې سېمه کې خپلو اهدافو ته ځان ورسوي.
شنکر زیاته کړې:«افغانستان باید چاته اجازه ور نه کړي،چې د هغوی له خاورو په استفاده نورو هېوادونو ته د ترهګرۍ ګواښ جوړ کړي.»
د استرالیا د بهرنیو چارو وزیرې مارېز پاین بیا ويلي، نړیوالو ټولنو ته اوس مهال اندیښنه همدا ده،چې افغانستان د ترهګرۍ د روزنې پر مرکز بدل نه شي.
مارېز پاین زیاته کړې:«موږ خپله ټوله هڅه کوو،چې د دې کار مخه ونیسو،ترڅو افغانستان یو ځل بیا د ترهګرو د روزنې پر مرکز بدل نه شي. هغه باید په پټنځای هم بدل نه شي. دا د نړیوالو اندیښنه هم ده.»
د ګاونډيو هیوادونو او په ځانګړې توګه د پاکستان له لوري پر نړیوال سټیج د افغانستان د استازیتوب په تړاو اندیښنې داسې مهال زیاتیږي،چې د یو شمیر راپورونو پر بنسټ، پرون په پاکستان کې د افغانستان په تړاو د پاکستان په کوربتوب له ګاونډیو هېوادونو سره امنیتي ناسته ترسره شوې ده.
دغه پرلیکه ناسته داسې مهال جوړېږي،چې پر افغانستان د طالبانو د واکمنۍ نږدې یوه میاشت پوره کېږي او سرپرسته کابینه یې هم اعلان کړې،خو تراوسه پورې یوه هېواد هم افغانستان کې حاکم حکومت په رسمیت نه دی پېژندلی.