د اسلامي امارت ویاند ذبیح الله مجاهد په خپله اېکس پاڼه لیکلي، د پکتيکا په برمل ولوسوالۍ کې د پاکستاني ځواکونو په هوايي بريد کې پر مرګ ژوبلې سربېره یو شمېر کورونه هم ویجاړ شوې دي.
ملي دفاع وزارت بیا د پاکستان بريد غندلی او ورته د ځواب ويلو ګواښ تر څنګ يې دا د پاکستان يوه “وحشيانه” کړنه بللې ده.
دغه وزارت د خپلې خاورې او حریم دفاع د افغانستان حق بولي.
د ملي دفاع وزارت ویاند عنایت الله خوارزمي وايي: « په دې بمبار کې ملکي وګړي چې ډېری یې د وزیرستان مهاجر دي، تر هدف لاندې نیول شوې او په کې یو شمېر ماشومان او نور ملکي وګړي شهیدان او ژوبل شوي دي. د افغانستان اسلامي امارت دغه وحشیانه عمل د ټولو نړیوالو اصولو خلاف عمل او ښکاره تېری ګڼي او په کلکو ټکو یې غندي. پاکستاني لوری باید پوه شي چې دا ډول خپلسري ګامونه هېڅ یوه ستونزه نه شي هوارولی. اسلامي امارت به دغه بزدلانه عمل بې ځوابه پرېنږدي بلکې له خپلې خاورې او حریم دفاع خپل مسلم حق ګڼي.»
که څه هم د پاکستان حکومت يا پوځ په رسمي ډول د دې بريدونو په اړه څه نه دي ويلي، خو اسوشیتید پرېس خبري آژانس په یوه راپور کې د پاکستان ۴ امنیتي چارواکو له قوله د نوم نه ښودلو په شرط ويلي، د دوی ځواکونو د افغانستان په خاوره کې دننه د هوايي بریدونو پرمهال د پاکستاني طالبانو د روزنې مرکزونه ویجاړ کړې دي.
دغو چارواکو ادعا کړې چې بريدونو کې يې د روزنې یو مرکز ویجاړ کړی او له پاکستاني طالبانو سره تړلي څو مهم قوماندانان یې له منځه وړي دي.
بله خوا، پخواني ولسمشر حامد کرزي په يوه پيغام کې د پاکستاني پوځیانو دا بریدونه غندلي.
کرزي زیاته کړې: « د پکتيکا پر ځينو سيمو د پاکستاني پوځيانو بريدونه په کلکو ټکو غندم او دا د افغانستان پر ملي حاکميت ښکاره تېری بولم. د دواړو هېوادونو تر منځ په اړیکو کې ترينګلتيا په سیمه کې د افراطيت د پياوړتيا او د افغانستان کمزوري کولو لپاره د پاکستان ناسمو سياستونو پايله ده.»
د افغانستان لپاره د امریکا پخواني ځانګړي استازي زلمي خليلزاد هم د پکتيکا په برمل ولسوالۍ کې د هوايي بریدونو په غبرګون کې ويلي، دا بريدونه ښايي د سرپرست حکومت له ځواب سره مخ شي.
هغه زیاته کړې: « د جګړې پر ځای دواړه هېوادونه داسې یوې هوکړې ته اړتیا لري چې دا مشخصه کړي چې ترهګري د افرادو یا ډلو له خوا د یو بل د امنیت ګواښلو لپاره ونه وکارول شي او غاړه ورته کېږدي. د پاکستان سفير تيار په کابل کې دی، خو آيا جنرال منير به اجازه ورکړي چې دغه مذاکرات پيل شي؟.»
پخواني ډيپلوماټان هم پر پکتيکا بريد د افغانستان پر حريم د ټولو اصولو خلاف عمل بولي.
اسلاماباد کې د افغانستان پخوانی سفير عبدالسلام ضعیف وايي: « د پاکستان مستبد نظامي دیکتاتوري د بېګناه معصومو افغانانو په نښه کولو سره غواړي چې په خپل ملت کې د سیاسي، امنیتي او اقتصادي بې ثباتۍ او د خلکو پر دوی باندې له بې باورۍ پام بل اړخ ته واړوي.»
پخوانی ډیپلوماټ عزیز معارج وايي: « په خواشینۍ سره پاکستاني چارواکي او په ځانګړې توګه پوځیان چې سیاسي او نظامي او د پالیسۍ جوړونې ټول واک او اختیار ورسره دی، د افغانستان پر وړاندې دوه ګونی چلن کوي. له یوې خوا راځي استازی معرفي کوي او د دوستۍ او همکارۍ خبرې کوي، خو له بلې خوا پوځي حملې کوي. دغه کار علاوه پردې چې د بشري او انساني حقونو خلاف عمل دی، د ټولو نړیوالو اصولو خلاف عمل هم دی. هېڅ هېواد حق نه لري د بل هېواد پر حریم او خاوره حمله وکړي.»
دا لومړی ځل نه دی چې د پاکستان پوځ د افغانستان پر خاوره بمباري کوي.
د روان ۲۰۲۴ کال په مارچ مياشت کې هم سرپرست حکومت ويلي وو چې پاکستاني جنګي الوتکو د پکتیکا په برمل او د خوست په سپېرې ولسوالیو کې “د ملکي خلکو پر کورونو” بمبارۍ کړې او دوی په ځوابي عمل کې يې ډېورنډ کرښې ته څېرمه د پاکستاني ځواکونو پوستې ووېشتلې.
