د امریکا ولسمشر جو بایډن په تکزاس ایالت کې د فارټ بلېس په نوم له هغې پوځې اډې لېدنه کړې، چې افغان کډوال په کې اوسېږي.
له بایډن سره دې پنډغالي ته خبریالان هم له دې امله تللي وو، تر څو هلته د افغان کډوالو څارلو روانه پروسه وګوري، خو خلکو سره د مرکو اجازه نه ده ورکړل شوې.
مسوولین وایي، دغه پنډغالی یې په دوو اونیو کې چمتو کړی، د ژوند ټولې آسانتیاوې لري او په وینا یې جغرافیا یې له افغانستان هغې سره ورته جغرافیا ده، چې د کډوالو لپاره غوره ګڼل شوې ده.
دوی وايي، دلته دا مهال د راغلو کډوالو روغتیایي او امنیتي څارنه کیږي او له هغې وروسته به امریکا کې د ژوند کولو اجازه ورکول کېږي.
امریکايي پوځي مایکل واګنر وايي: «لومړی موږ د دوی کورونا ټیسټ کوو، وروسته ورته کمپ ته ښه راغلاست وایو او مالومات ورکوو، چې په دې کمپ کې څه آسانتیاوې شته. له هغې وروسته موږ کډوالو ته د کورونا واکسین ورکوو. وروسته دوی اجازه پیدا کوي چې کمپ کې میشت شي او له خپلې خیمې بهر ته هم ووځي.»
له دې پنډغالي څخه تر دې دمه هېڅ یو افغان ته اجازه نه ده ورکړل شوې چې بهر ووځي او امریکا کې میشت شي.
بل خوا بیا امریکا ته د تازه کډوال شویو افغانانو له ډلې پنځه تنه د شري پر ناروغۍ اخته شوي، چې دغه هېواد ته یې د نورو افغانانو لیږد ځنډولی او د سرخکانو یا شري واکسین ورته جبري شوی دی.
د سپينې ماڼۍ ویانده جېن ساکي وايي: «امریکا ته د راغلیو افغان کډوالو له ډلې پنځو هغوی یې د شري ناروغۍ لرله، چې له امله یې امریکا ته راتلونکې الوتنې وځنډیدې. دغه کسان دا مهال کرنیتن دي. زموږ روغتیايي چارواکي د هغو کسانو په لټه کې دي، چې له دوی سره په اړیکه کې پاتې شوي وو. له دې وروسته د افغان کډوالو لپاره د شري ناروغۍ واکسین جبري شوی دی.»
د امریکا دا پریکړه به په جرمني او قطر کې هغه افغان کډوال له سختو ستونزو سره مخ کړي چې دا مهال امریکا ته د تګ لپاره انتظار دي او له کورنیو سره په سختۍ کې ژوند تیروي.
د جرمني په رامسټین پوځي اډه کې دمګړی لس زره افغان کډوال امریکا ته د تګ لپاره په تمه دي، چې هتله یې لس ورځنی مهلت پوره شوی، خو د نوې پریکړه له امله امریکا ته نه لېږدول کیږي.