پاکستاني چارواکي له تېرو څو لسیزو راهیسې له افغان کډوالو سره ناوړه چلن کوي او له ګڼو ستونزو سره یې مخ کړې دي.
د پوليسو له لوري نيول کېدل، وهل ډبول او په بېلابېلو پلمو پیسې ترې اخیستل هغه څه دي چې هلته د مېشتو افغانانو په خبره، دوی هره ورځ ورسره مخ دي.
تازه د کډوالو او بېرته راستنېدونکو چارو وزارت ويلي، د پاکستان کراچۍ له زندان ۵۳ تنه افغانان را خوشې شوې، خو کراچۍ کې د افغانستان کونسل له بندخونې د خوشې شویو کسانو شمېر ۱۰ تنه ياد کړی.
په کراچۍ کې د افغانستان کونسل عبدالجبار تخاري وايي: « یوه میاشت وړاندې د یوې ښځې او څو ماشومانو په ګډون ۱۰ تنه بندیان د سند ایالت له بېلابېلو زندانونو آزاد شوې او وطن ته استول شوي وو، خو د لارې په اوږدو کې د ځینو دلایلو له امله د پاکستان د حکومت له خوا راګرځول شوي وو. زموږ د هڅو په پایله کې هغوی بېرته خوشې او هېواد ته ستانه شول.»
پاکستان که څه هم په تېر یوه کال کې د افغان کډوالو سلګونه زره کورنۍ افغانستان ته په زور راستنې کړې، خو لاهم زیات شمېر افغانان له خپلو کورنیو سره په ياد هېواد کې مېشت دې.
د سیاسي چارو شنونکي د افغان کډوالو پر وړاندې د پاکستاني ځواکونو چلن د نړیوالو قوانیو خلاف عمل بولي او له سرپرست حکومته غواړي چې له پاکستان سره په دې اړه خبرې وکړي.
د سیاسي چارو شنونکی شهسوار سنګروال وايي: « دا یو ښه ګام دی خو باید داسې ګام پورته شي چې د دوی په بندوخونو کې پراته زرګونه افغانانو سره هم د بشري خواخوږۍ له مخې، د ګاونډیتوب د خواخوږۍ له مخې، هغوی هم خوشې کړي. زه فکر کوم د دوی خوشې کېدل ښايي د دواړو خواوو ترمنځ سیاسي اړیکو ته هم لاره پرانیزي.»
ځینې نور بیا وايي، پاکستان د افغانستان په مسایلو کې تل دوه مخی چلن کړی او په خبره يې، د کډوالو په شمول په ټولو برخو کې يې پر خپلو ژمنوعمل نه دی کړی.
د سیاسي چارو شنونکی ظاهر بهاند وايي: « دمګړې د پاکستان په بېلابېلو بندخونو کې په زرګونه افغان کډوال خپلې شپې ورځې سبا کوي. ډېری یې هغه افغان کډوال دي چې د اسنادو نه لرلو یا د اسنادو نه شتون له امله نیول شوې دي.»
په پاکستان کې مېشتو افغان کډوالو په وار وار له رسنیو سره په خبرو کې ویلي، پاکستانې عسکر يې د تلاشۍ په پلمه کورونو ته ورځي او نيسي يې.
د افغان کډوالو په خبره، پاکستان کې د اوسېدو قانوني اسناد لري، خو بیا هم په بېلابېلو پلمو ځورول کېږي.
