په پاکستان کې ناامني او وسله وال بریدونه زیات شوې او یوازې وروستي برید کې چې په جنوبي وزیرستان کې د دغه هېواد د پوځ پر یوې پوستې ترسره شوی، ۱۶ پوځیان په کې وژل شوي او ګڼ شمېر نور یې ټپیان دي.
د برید مسوولیت هم د پاکستاني طالبانو تحریک (ټي.ټي.پي) منلی.
د سیاسي چارو کارپوهان وايي، ټول هغه وسله وال حرکتونه چې د پاکستان تر کنټرول لاندې سیمو کې فعالیت لري، د اسلام آباد د ناسمو سیاستونو پایله ده.
دوی زیاتوي، راتلونکو کالونو کې به په پاکستان کې ناامني نوره هم زیاته شي او وسله بریدونه به زور واخلي.
د دوی په اند، پاکستان کې د ناامنیو زیاتېدو او د روانې مرګ ژوبلې مسوولیت خپله د دې هېواد پوځ او استخباراتي ادارو ته ورګرځي او د اسلام اباد له لوري په دې تړاو پر نورو هېوادونو تور پورې کول جنایت بلل کېږي.
د سیاسي چارو کارپوه قریب الرحمان شهاب وايي: «د ټي.ټي.پي په ګډون ټول هغه وسله وال خوځښتونه چې د پاکستان په جغرافیا یا د پاکستان تر کنټرول لاندې سیمو کې فعالیت لري، دا د پاکستان د خپلو سیاستونو پایله ده او هغه ماران چې د نورو د چیچلو لپاره تربیه شوي، دا به یوه ورځ خامخا دوی هم چیچي او د دې احتمال شته چې په راتلونکو کالو کې دغه بریدونه، خوځښتونه او نا امنۍ لا پسې زیاتې شي؛ ځکه هغه فکټورونه چې په سیمه کې موجود دي، د دې څرګندونه کوي چې دا بریدونه او نا امنۍ به زیاتېږي.»
د سیاسي چارو کارپوه توریالی ځاځی وايي: « په پاکستان کې چې دا څه لوبې روانې دي، که دا اقتصادي دي، که سیاسي دي که امنیتي دي، مسوولیت یې خپله د پنجاب د پوځ، د پنجاب د حکومت او د آی.اېس.آی پر غاړه دي. دوی په کوزه پښتونخوا کې د بلوچانو په سیمه کې څه د پاسه ۸۰ زره تنه ووژل او د ډېر شمېر انسانانو که هغه ماشومان دي که ښځې او یا نارینه، مړي او ژوندي یې ورک دي. د دغو ناروا لوبو پر وړاندې خپله د پنجاب حکومت مسوولیت لري نه بل هېواد. هغه تورونه چې دوی یې په نورو هېوادونو لګوي، دا د دوی له خوا یو جرمي جنایت دی، ولې دوی په خپل هېواد کې امنیت نه شي تأمینولی او غواړي ځان په دې پلمه د نړیوالو پر وړاندې له دغو جنایاتو وژغوري.»
په ورته مهال، د افغانستان لپاره د امریکا پخواني ځانګړي استازي زلمي خلیلزاد پر خپلې اېکس پاڼې لیکلي، په پاکستان کې امنیتي وضعیت ورځ تر بلې خرابیږي او په کې وروستۍ امنیتي پېښې د اندېښنې وړ دي.
خلیلزاد زیاته کړې:« په پاکستان کې امنیتي وضعیت د اندېښنې وړ دی. پر پاکستاني پوځیانو د ټي.ټي.پي بریدونه د لویې ناکامۍ ترڅنګ د دغه هېواد لپاره ستر زیان هم دی.»
یو شمېر کارپوهان له اوسني وضعیت د وتلو لپاره اسلام اباد ته مشوره ورکوي چې له نړیوال تروریزم سره له همکارۍ ډډه وکړي او د هغو استخباراتي پروژو له اخیستلو لاس واخلي چې موخه یې په سیمه کې د ترهګرۍ ترویج او بیا یې پر وړاندې نمایشي مبارزه ده.
د سیاسي چارو کارپوه یوسف امین ځاځی وايي: « د پاکستان وضعیت ترینګلی دی، چاودنې کېږي او خلک په کې وژل کېږي، نظامیان یې وژل کېږي. د پاکستان واکمنانو ته زموږ مشورې دا دي چې څو مسایل په پام کې ونیسي. دا هېواد باید له داسې هېواد راوباسي چې هغه د انګرېزانو، امریکایانو او بهرنیانو یوه پروژه ده. دوی باید له نړیوال تروریزم سره همکاري بنده کړي.»
له هغې وروسته چې په پاکستان کې د ټي.ټي.پي له لوري بریدونه زیات شوې، اسلام اباد یې پړه پر کابل اچولې، هغه څه چې افغان لوري تل په کلکه رد کړې او ډاډ ورکړی چې له افغان خاورې به هېڅ هېواد ته خطر پېښ نه شي.
