په هېواد کې له وروستي سیاسي تحول او د اسلامي امارت له بیا ځل واکمنېدو وروسته، له څو محدودو هېوادونو پرته د سعودي عربستان په ګډون ټولو هغو هېوادونو خپلې سفارتي چارې وځنډولې چې له دې وړاندې یې کابل کې پرانېستي سفارتونه لرل.
په تېرو څه باندې درېيو کلونو کې یو شمېر هېوادونو په کابل کې خپل سفارتونه بېرته پرانېستل چې وروستی هغه يې سعودي عربستان دی.
په کابل کې د سعودي عربستان سفارت پر خپله اېکس پاڼه لیکلي، د یکشنبې په ورځ(د ۱۴۰۳ کال د مرغومي ۲) یې خپلې سفارتي چارې د سعودي عربستان د تمایل له مخې او افغانانو ته د خدماتو وړاندې په موخه بېرته پيل کړې.
سفارت زیاته کړې: « د سعودي عربستان شاهي دولت افغانانو وروڼو ته د ټولو خدمتونو وړاندې کولو لپاره د تمایل له مخې، پرېکړه وشوه چې د سعودي عربستان استازولۍ په کابل کې خپل فعالیتونه د ۲۰۲۴کال د ډسمبر له ۲۲مې بېرته پیل کړي.»
د بهرنیو چار وزارت د سعودي عربستان له دې پرېکړې د هرکلي ترڅنګ، دا کار د دواړو هېوادونو ترمنځ د اړیکو د پراختیا او د افغان مسافرو د ستونزو هواري لپاره مهم ګام بولي.
د دې ترڅنګ، یاد وزارت مقابل لوري ته د پوره خوندیتابه او ورسره د هر اړخیزې همکارۍ ډاډ ورکوي.
د بهرنیو چارو وزارت د ویاند مرستیال ضیا احمد تکل وايي: « کابل کې د سعودي عربستان د سفارت بیا پرانیستلو هرکلی کوو او ډاډ ورکوو چې د افغانستان اسلامي امارت د بهرنیو چارو وزارت به ورسره په ټولو چارو کې همکار وي او د هغوی خوندیتوب ته به ډېره پاملرنه کوي. دغه راز، موږ خوشبین یو چې د دوی د سفارت بیا پرانیستل به د افغانستان او سعودي عربستان ترمنځ اړیکې او همکارۍ پراخې کړي او دغه راز به وکولی شي چې په سعودي عربستان کې د مېشتو افغانانو مشکلاتو او غوښتنو ته پر وخت رسېدنه وشي او هغوی ته په ښه ډول تسهیلات چمتو شي.»
د سیاسي چارو کارپوهان وايي، هېوادونو له یو بل سره سفارتي او ډېپلوماټیکې اړیکې دوه اړخیزو تعاملاتو او اړتیاو ته په کتو ساتي او همدې ګډو ګټو ته په کتو، دغه اړیکې ځینې وختونه له بدلونونو سره مخامخ کېږي.
دوی په افغانستان کې د سعودي عربستان د سفارت بیا پرانیسته په دې هېواد کې د مېشتو افغان مسافرو د ستونزو هوارولو ترڅنګ، د سیاسي تعاملاتو د پراختیا لپاره اړین ګام ګڼي.
د پوهنتون استاد فېض محمد ځلاند وايي: «سفارتونه تر ډېره بریده پورې د دوه اړخیزو تعاملاتو، اړتیاوو او ډیپلوماټیکې راکړې ورکړې لپاره پرانېستل کېږي. کله چې هېوادونه په ځینو نورو هېوادونو کې د ګډون همکاریو، ګډو ګټو او د خپلو ملي ګټو د تأمین لپاره هلې ځلې کوي، دوی کوشش کوي په کوربه هېواد کې خپل سفارت پرانیزي، خپل ډیپلوماټان واستوي، ترڅو وکولی شي خپلې ملي ګټې خوندي کړي.»
پخوانی ډیپلومات عزیز معارج وايي: « په ټوله کې یوه غټه لاسته راوړنه ده؛ ځکه سعودي عربستان دغه اقدام وکړ او اوس به نور عربي هېوادونه او حتا د نړۍ ۵۷ اسلامي هېوادونه هم دېته هڅول کېږي چې له افغانستان سره اړیکې جوړې کړي او دا کار د افغانانو پر ګټه دی. په ځانګړې ډول سعودي مېشت افغانان چې ځي راځي، دغه راز د سوداګرو لپاره، د نړیوالو مرستو لپاره او د نړیوالو د هڅولو لپاره ډېر مهم دی. دغه شان افغانستان کېدای شي له نړیوالې انزوا بچ شي.»
سعودي عربستان داسې مهال په افغانستان کې خپلې سفارتي چارې بېرته پیلوي چې د ۲۰۲۳زېږدیز کال له فبررۍ وروسته یې په کابل کې خپل سفارت او کونسلي چارې وځنډولې، که څه هم خپلې کونسلي چارې یې د همدې کال په نومبر کې بېرته پیل کړې.
د سرپرست حکومت چارواکي وايي، اسلامي امارت دا مهال له شاوخوا ۴۰ هېوادونو سره رسمي ډېپلوماټیکې اړیکې لري چې له دې ډلې یې یو شمېر کابل کې پرانیستي سفارتونه هم لري.
