Skip to content
طالبانو خپله سرپرسته کابینه اعلان کړې، خو له تېرو دوو ورځو راپه دې خوا کابینې کومه رسمي ناسته نه ده رابللې،یوازې د یو څو وزارتونو وزیرانو له کومې لوړې پرته پر خپل کار پیل کړی دی.
د طالبانو په کابینه کې یو شمېر سرپرست وزیران د امریکا او ملګرو ملتونو په تورلیست کې هم شامل دي.
د امنیتي ارګانونو وزیرانو د بندو دروازو ترشاه کار پیل کړی دی.
د خلاصون لارې شورا مشر سید اکبراغا وايي:« ټول کابل ته راغلي دي، د باندې نه شته عمومي جلسه تر اوسه مالومه نه ده، فکر کوم،چې وبه نه شي. طالبان به کوښښ وکړي چې د تور لیست موضوع حل کړي، خو کېدای شي،هغه کسان چې تور لیست کې شامل دي چېرته لاړ نه شي.»
طالبانو د تورلیست په تړاو یوه خبرپاڼه کې په امریکا نیوکې کړي دي، چې د دوحې له هوکړې یې سرغړونه کړې ده،هغه هوکړه چې طالبانو سره ژمنه شوې وه،چې د دوی د مشرانو نومونه به له تورلیسته لېرې کېږي.
د سیاسي چارو تحلیل کووني وايي، اوس یې له طالبانو غوښتنه دا ده،چې کابینه کې هغه کسان شامل نه کړي،چې تورلیست کې شامل دي،چې په وینا یې کېدای شي د حکومتولۍ چارې له خنډ او ځنډ سره مخ کړي.
د سیاسي چارو تحلیل کوونکی توریالی ځاځی وايي:« طالبانو ته مشوره دا ده،چې هغه کسان چې د نړیوالو په تورلیست کې شامل دي،کابینه کې ځای ورنه کړي، ځکه دوی ته نړۍ متوجې ده او د دوی اعمال ګوري.»
د طالبانو له لوري کابینه هم ملاتړ او مخالفت دواړو سره مخ ده.
یو شمېر کارپوهان بیا د تورلیست مسله حل کېدونکې بولي،خو تمه او غوښتنه یې دا ده،چې خلکو ته باید خدمات وړاندې شي.
د سیاسي چارو تحلیل کوونکی نصیر اخترزوی وايي:« د کابینې غړي تورلیست کې دي، دا یوه زړه مسله ده. طالبان اوس واکمن دي او په افغانستان باندې دا د دوی کار دی،چې څوک کابینه کې راولي،خو خلک خدمت ته اړتیا لري.»
په همدې حال کې طالبانو ویلي،چې نوې کابینه سرپرسته ده او په دې اړه دې خلک هېڅ تشویش نه کوي،خو دا څرګنده نه ده،چې دا موده به ترکومه وي.
