هغه وايي، د ایته په نوم له یو ډول انګورو ابجوشي جوړیږي،چې د ځانګړي خوند او کيفيت څخه برخمني دي.
هغه زیاتوي:«لومړی انګور په باغ کې دانې کوو. بیا دلته یې کوډلې ته راوړو. له هغه وروسته بیا د جوش یا پخولو مرحله ده. لومړی په جوش اوبو کې وینځل کېږي،په تیزابو کې جوش ورکول کېږي، وروسته پر پاکه ځانګړې ځمکه لمر او باد ته هوارېږي او تر هغه ورسته په ځانګړو کارټنونو کې بسته کېږي او لېږل کېږي.»
د عبدالباقي په نوم يو بل بڼوال بيا وايي، سږکال له وچکالۍ سره سره کندهار کې زياتي ابجوشي پروسيس شوي او تمه لري،چې په کورنیو او بهرنیو مارکيټونو کې به یې بازار هم مناسبت وي.
عبدالباقي زیاتوي:«که څه هم سږ کال طبعي افتونه زیات وو، وچکالي وه، جګړه وه، خو بیا هم زموږ حاصلات ښه دي. ان شاء الله موږ به ښه عاید تر لاسه کړو.»
اخوا د کندهار سوادګرۍ خونې مرستیال عبدالباقي بینا هم وایي، سږ کال کندهار کې له انګورو زياتي ابجوشي په لاس راغلي،چې له ۱۳ زره ټنه به زیات شي.
د بینا په خبره،چې دا ابجوشې به د پاکستان او هند په ګدون د متحده عرب اماراتو مارکيټونو ته هم واستول شي.
بینا زیاتوي:«د کندهار ابجوشي،چې د وچې مېوې هر مارکېټ ته رسېدلي، هلته یې ځانګړي مینه وال پیدا کړي دي. آن دا په نړيوالو مارکېټونو کې د طلايي ممیزو په نوم یادېږي او ښه بازار لري.»
