خلیل الرحمن حقاني وایي، لومړیتوب یې دا دی، چې په بهرنیو هېوادونو کې بندي افغانان به راخوشې کوي او په خبره یې نړۍ ته به قناعت ورکوي، که مجرمین وي، افغانستان کې به یې محاکمه کوي.
حقاني وايي:« که کوم داسې جرم وي، چې هغه د دوی د قانون پر نبسټ جرم وي او یا د دنیا له اصولو مخالفت وي، نو موږ تیار یوو، چې هغه په خپل ملک کې محاکمه کړو، خو دا مهرباني دې وکړي، چې سر له نن دې زموږ مهاجر بندیان چې هر هېواد کې وي هغه دې ازاد کړي.»
حقاني وایي، په تېر حکومت کې د ډېری کډوالو ځمکې او نمرې غصب شوي دي، چې دوی به یې بېرته راوګرځوي او مالکینو ته به یې وسپاري.
په ورته وخت کې حقاني ژمنه وکړه، چې نه خپله فساد کوي او نه به چاته اجازه ورکړي، چې فساد وکړي.
حقاني زیاتوي:« زه اول له خدای سره بیا له ټول ملت سره دا ژمنه کوم، چې زه به په هېڅ قسم د وزارت مهاجرین په مال کې خیانت نه کوم او نه یوه روپۍ، چې ماته ډېر محبوب دي پلار، ورور یا زوی هغوی ته نه ورکوم او نه ځان ته.»
حقاني له خلکو د مشورو غوښتنه وکړه او پر ټولو یې غږ وکړ، چې د چارو پرمختګ او ښه والي کې حکومت سره همکاري وکړي.
