له اداري فساد سره د مبارزې ځانګړي سکرتریت د فساد په تړاو د سیګار ورستی راپور غیر مسلکي او ناسم وباله.
دغه اداره د افغانستان په بیا رغونې د څار امریکايي بنسټ یا سېګار راپور رد کړ او باور یې وښود چې سیګار د راپور لپاره استدلال نه لري او په ادعاوو جوړ شوی دی.
دوی له اداري فساد سره د مبارزې ملي استراټيژۍ د تطبیق کې لاسته راوړنو ته خوشبینه دي چې په خبره یې د نړیوال شفافیت سازمان د فاسدو هېوادونو په درجه بندۍ کې به د افغانستان په موقف غوره اغېزه ولري.
د دوی په خبره د سېګار راپور محتویات له افغان لوري سره همغږي شوي نه دي او په غیرې معیاري توګه ترتیب شوی و.
دې ادارې خپل شپږ میاشتنی راپور خپور کړ چې د حکومت لاس ته راوړنې پکې ستایل شوي چې په لوړه کچه اصلاحات راغلي دي.
له اداري فساد سره د مبارزې ځانګړي سکرتریت له اداري فساد سره د مبارزې ملي ستراټيژۍ د تطبیق شپږ میاشتنی راپور وړاندي کړ.
دغه اداره د حکومت له لوري د وزیرانو او معینانو په سطحه د مفسدو چارواکو محاکمه له فساد سره د مبارزې په برخه کې ستايي او د پنځو نورو وزیرانو د محاکمې خبره کوي چې په فساد تورن شوي دي.
له اداري فساد سره د مبارزې ځانګړي سکرتریت مشر یما ترابي دولتي مامورینو د جایدادونو ثبت د استخدام په برخه کې د قوانینو تعدیل او تازه ګمارل شوي مامورینو ته د اداري فساد په تړاو ښونه له اداري فساد سره د مبارزې ملي استراټيژۍ د تطبیق ځينې لاسته راوړنې بولي.
