له پوهنتونونو د ښځینه محصلینو له منع کېدو د دوه کاله پوره کېدو سره هم مهاله د امریکا بهرنیو چارو وزیر انټوني بلېنکن د افغان ښځو او نجونو پر وړاندې د لګول شویو محدویتونو د سملاسي لرې کېدو غوښتنه کړې.
بلېنکن د اېکس په یوه بیان کې ویلي، له تېرو دوه کلونو راهیسې د افغانستان سرپرست حکومت چارواکو ښځې او نجونې له پوهنتونونو راګرځولې او په نا دولتي موسیسو کې یې له کار کولو منع کړې دي.
بلېنکن افغانې ښځې د یوه باثباته، سوله ییز او پرمختللي افغانستان لپاره اساسي برخه بللې او له اسلامي امارت یې غوښتي چې هر ډول لګول شوي محدیویتونه لغو کړي.
هغه زیاته کړې: « دوه کاله تېر شول چې طالبانو په پوهنتونونو کې د ښځو او نجونو او په نادولتي موسسو کې یې پر کار کولو بندیز لګولی. موږ له طالبانو غواړو چې سمدستي دغه فرمانونه لغوه کړي.»
له دې سره هم مهاله د افغان د ښځو، نجونو او بشري حقونو لپاره د امریکا ځانګړې استازې رینا امیري د نجونو پرمخ د تحصلي بنسټونو تړولو دویمې کالیزي په مناسبت د نړیوال پیوستون غوښتنه کړې.
امیري ویلي، نړیواله ټولنه باید د افغانستان سرپرست حکومت سره په هر ډول تعامل کې د بشري حقونو، په ځانګړې توګه د ښځو او نجونو حقونو ته لومړیتوب ورکړي.
امیري په دې اړه وايي: « نړیواله ټولنه باید له طالبانو سره په هر ډول تعامل کې د بشري حقونو، په ځانګړې توګه د ښځو او نجونو حقونو ته لومړیتوب ورکړي. د ډیپلوماټیکو او اقتصادي اړیکو پرمختګ باید د هغو بنسټیزو اقداماتو سره تړلی وي چې د ښځو او نجونو پر وړاندې تګلارې لغوه کړي. همدارنګه غړي هېوادونه، مرستندویه ادارې، اکاډمیکې موسسې او خصوصي سکټور باید د افغان ښځو او نجونو د استقامت او نوښتونو سره د څرګند ملاتړ په توګه، د سرچینو، ټکنالوژۍ، زده کړو، د کار وسیلو او اقتصادي فرصتونو برابرولو کې هڅې وکړي.»
بله خوا، د افغانستان پخواني ولسمشر حامد کرزي هم یو ځل بیا له سرپرست حکومت غوښتي چې د نجونو پرمخ د ښوونځیو او پوهنتونونو دروازې پرانیزي او په خبره یې د نجونو له تعلیم پرته به افغانستان هېڅکله هم ښه راتلونکی ونه لري.
کرزي پر خپله اېکس پاڼه لیکلي:« د علم او پوهې لپاره زموږ د هېواد د نجونو غوښتنه او آواز یو برحقه او د یوه سوکاله افغانستان لپاره غږ دی. د ځوان قشر توانمندۍ د ټولنې د ځان بسیاینې، له احتیاجه د خلاصون، د پرمختګ او آبادۍ یوازینۍ لار ده. د افغانستان د ښیرازۍ او ترقۍ لپاره تعلیم حیاتي دی او هیله لرم چې په هېواد کې د نجونو پرمخ د ښوونځیو او پوهنتونونو دروازې ژر تر ژره پرانیستل شي.»
د نړیوالو اړیکو کارپوه سمیر انګار وايي: « اسلامي امارت ته لازمه ده چې د افغان ولس مشروع غوښتنې ومني او نجونو ته د تعلیم او تحصیل زمینه برابره کړي.»
د نجونو پرمخ د تحصيلي بنسټونو د تړلو دوه کاله پوره شول، خو لا هم افغان نجونې د دې حق پر تامين ټینګار کوي او له سرپرست حکومت غواړي چې د دوی دا اسلامي او انساني حق ورته ورکړي.
زده کړیاله فاطمه وايي: « ما غوښتل چې په راتلونکي کې ډاکټره شم، اوس چې د زده کړو اجاز نه راکول کېږي، زه نه شم کولی خپلو هیلو ته ورسېږم. له حکومت غوښتنه کوم چې پر خپلو پرېکړو له سره غور وکړي او نجونو ته د زده کړو اجازه ورکړي.»
سره له دې چې سرپرست حکومت د نجونو پرمخ د پوهنتونونو او ښوونځيو د پرانیستنې په اړه څه نه وایي، خو تر دې وړاندې یې ویلي و چې د نجونو پرمخ د پوهنتونونو او ښوونځيو د بیا پرانيستلو په تړاو هڅې روانې دي.
د څه باندې دوه کالو په تېريدو سره لاهم سرپرست حکومت د افغان نجونو د دغه برخليک په تړاو نهايي پريکړه نه ده کړې.
