Skip to content
د سیاسي چارو یو شمېر شنونکي وايي، په کابل کې د امریکا او بریټانیا سربېره د نورو هېوادونو د سفارتونو تړل به راتلونکی حکومت له ننګونو سره مخامخ کړي.
شنونکي د سفارتونو د تړلو موضوع جدي بولي چې دا چاره د راتلونکي حکومت پر مشروعیت او رسمیت پېژندنې اغیزه کوي، نړیوالې مرستې ورسره کمېږي او ان په دې هېواد کې د ملګرو ملتونو په بشري فعالیتونو هم اغیز کولی شي.
دوی وايي، طالب مشران باید دې برخې ته خپله پاملرنه زیاته کړي او نړیوالو ته قناعت ورکړي.
د کابل پوهنتون استاد فیض محمد ځلاند وايي:« له همدې امله د طالبانو د راتلوونکي حکومت په اړه ډیپلوماتیکې ستونزې رامنځته کوي،کېدی شي، د مشروعیت او پېژندنې ستونزې هم رامنځته کړي. دغه راز د مرستو کموالي او په لویه کې د ملګرو ملتونو د استازو د دفترونو تړلو لامل به هم کېدی شي.»
امریکا ویلي، ټول ډپلوماټان یې له کابله اېستلي او سیاسي ماموریت یې د قطر پلازمېنې دوحې ته لېږدولی دی.
د امریکا د بهرنیو چارو وزیر نه ده روښانه کړې،چې په کابل کې بیا خپل دیپلوماتیک حضور کله پیل کوي.
طالبان وایي، دې برخې ته یې پاملرنه شته او سیاسي رهبري یې کار کوي،چې د راتلونکي حکومت په تړاو د نړیوالو قناعت ترلاسه کړي.
د طالبانو ویاند ذبیح الله مجاهد وايي:« په دې برخه کې مو وړاندې هم کار کړی دی او له دې وروسته به هم هلې ځلې کوو. کومه اداره،چې په راتلوونکې کې جوړېږي، هغه مسوولیت لري،چې په ډیپلوماتیکه برخه کې د ټولو هېوادونو باور ترلاسه کړي، هم په ډیپلوماتیکه اړیکو کې خلکو ته باور ورکړي او هم هغه یو ذهنیت، چې موجود دی، ګڼې د افغانستان له خاورې به چاته زیان رسېږي، دا ذهنیت لري. په رېښتینې بڼه خلکو ته دا ډاډ ورکړي،چې افغانستان د چا لپاره زیان نه پېښوي. »
وړاندیز دا دی،چې طالبان دې د ښځو حقونو، بشر حقونو او بیان ازدۍ خوندیتوب برخه کې نړیوالو ته قناعت ورکړي او د هغوی اندېښنې دې ځواب کړي.
دا خبرې داسې مهال کېږي،پرون په افغانستان کې د بهرني پوځي حضور د بشپړ پاېته رسېدو سره سم امریکا، بریتانیا او ځینو نورو هېوادونو خپلې دیپلوماتیکې اړیکې وځنډولې او په کابل کې یې سفارتونه وتړل.
