د اسلامي امارت غوښتنه دا ده،چې په پنجشیر کې میشت مشران دې کابل ته راشي او امنیت یې خوندي دی او په دغه ولایت کې ټول دولتي وسایل او وسلې دې مرکزي حکومت ته وسپاري .
خو بیا برعکس د احمد مسعود وړاندیزونه دا دي،چې له پنجشیره به هېڅ وسله نه راوړل کېږي، طالبان دې پنجشیر ته نه ورځي او همدا راز د نوموړي پلار دې د ملي اتل په نوم وپیژندل شي.
مجاهد وايي، امارت د جګړې طرفدار نه دی،خو که مقابل لوري یې له خبرو پرته بله لار غوره کړه نو وار دمخه یې پنجشیر له څلور اړخونو محاصره کړی او پر وړاندې به یې پرېګنده اقدام وشي.
مجاهد زیاته کړه:« موږ جګړه نه غواړو. نور یو افغان هم باید ونه وژل شي او د دې لپاره پلمه جوړه نه شي. خو که اړتیا پيدا شوه، دا چې ۳۳ ولایتونه ارام دي او که پنجشیر کې څوک بغاوت کوي، دې ته افغانان اجاز نه شي ورکولای. موږ به بیا پرېکنده ګام پورته کوو. اوس مو د پنجشیر په داخل کې له څلور خواوو ځواکونه ځای پر ځای کړي دي.»
خو له پنجشیر ولایته تازه مالومات دا دي،چې هلته له طالبانو سره د جګړې او مقاومت لپاره پراخ چمتوالی روان دی او ټولو هغو ستراتیژیکو نقطو کې یې مرچلې جوړې کړي،چې د جګړې لپاره ګټورې یادېږي.
