لوړ پوړي امریکایي چارواکي وایي،په برید کولو موخې ته رسېدلي او د داعش ډلې هغه غړی یې پر نښه کړی،چې پر کابل هوايي ډګر یې بریدونه پلان کړي وو.
په یاد کلي له برید وروسته لا هم درنه چوپتیا خپره ده،کلیوال له کورونو نه راوځي.
د وژل شوي کس ګاوندی وايي:« د شپې شااوخوا ۱۱ نیمې بجې وې. موږ پر چت وېده وو، دې وخت کې یو درز شو. ماشومانو دې وخت کې چېغې کړې.الوتکه راغله او پر موږ یې له پاسه یو ډول شعاع وکاروله. شنه رڼا وه. موږ بېرته له چت ښکته شو او په دې وخت کې چیغې لا زیاتې شوې. وروسته بیا چیغې ورو، ورو کمې شوې. وروسته بیا یو موټر راغی او ټپي یې انتقال کړ. »
کلیوال بیا د امریکایي چارواکو له څرګندولو نا خبره دي او وایي، وژل شوی کس یې تر اوسه پورې په هېڅ وسله وال فعالیت نه وولېدلی او عادي ژوند یې کاوه.
د وژل شوي کس ګاوندی وايي:« دا خلک دلته له ډېر وخته اوسېدل. بېچاره به زرنج موټرسایکل چلاوه او له چا سره یې بدیه رویه نه ده کړې. دې کس هېڅ اړېکې نه لرلې او نه موږ لېدلی،چې خلک یې راوستي وي. ډېر وخت کېده، چې موږ دا کاته، زرنج به یې سهار له کوره وباسه او ماښام به بېرته کور ته راستنېده.»
له دې برید وروسته د شنبې مازیګر د خوګیاڼو په شېر زادو ولسوالۍ کې هم ورته بریدونه شوي،خو تر اوسه معلومه نه ده،چې په دغو بریدونو کې څوک په نښه شوي دي.
امریکا خبرداری ورکړی،هر هغه ډله به په نښه کړي،چې دوی او سرتېرو ته یې ګواښ پيښوي.
د امریکا ولسمشر دغه خبرداری وروسته له هغې ورکوي،چې د داعش ډلې له خوا پر کابل هوايي ډګر د پنجنشبې ماښام غبرګو چادونو کې د ۱۵ امریکايي سرتېرو په ګډون نږدې دوه کسان ووژل شول او له یو نیم سلو زیات ټپيان شول.
