د پاکستان بهرنیو چارو وزارت ویاندې ممتاز زهرا بلوچ ویلي، یو شمېر افغانانو په اسلام اباد کې د تحریک انصاف ګوند پر پلوۍ په لاریونونو کې برخه اخیستې ده.
بلوچ ادعا کړې چې امنيتي ځواکونو د تحریک انصاف ګوند پر ملاتړ لاریونونو کې د یو شمېر افغانان نېولې دي.
د بلوچ په خبره، د پاکستان پالیسو او کډوالۍ قانون سره سم ټولو بهرنیو وګړیو ته په اسلام اباد کې د ژوند کولو حق ورکول کوي.
هغې زیاته کړې:« موږ په دې باور یو چې هر بهرنی وګړی چې د پاکستان په سیاسي فعالیتونو کې برخه اخلي د منلو وړ نه دی او له ټولو بهرنیو وګړیو دا تمه لرو چې د پاکستان قوانین او کلتور ته درناوی وکړي. همداراز په لاریونونو کې د افغانانو د ګډون په اړه کورنیو چارو وزارت جزئیات ورکړي دي.»
دوه ورځې وړاندې کله چې د عمران خان د مېرمنې بشرا بي بي په رهبرۍ د تحریک انصاف ګوند پلویانو په اسلام اباد کې خپل لاریونونه وځنډول، د دې هېواد کورنیو چارو وزیر محسن نقوي او د اسلام اباد د پولیسو مشر علي رضوي پاکستاني رسنیو ته په خبرو کې ادعا وکړه چې د تحریک انصاف د پلویانو په لاریونونو کې د نیولو شویو کسانو له ډلې يې شاوخوا ۲۰ تنه افغانان دي.
محسن نقوي ویلي وو، د نوي زېږدیز کال له پیل وروسته به د افغانانو په ګډون هېڅ بهرني وګړي ته له اجازت نامې پرته په اسلام اباد کې د ژوند کولو اجازه ورنه کړي.
د پاکستان حکومت د دغه هېواد په کورنیو ستونزو کې د افغانانو ښکلتیا سربېره د افغان سوداګرو لپاره د سوداګرۍ په برخه کې ننګونې زیاتې کړې او له دغه هېواد سره د سوداګرۍ کچه یې بې مخینې توګه راکمه کړې.
بل لور ته يو شمېر فغان پانګوال وايي، پاکستان د افغانستان پر صادارتو ماليه زياته کړې او دغه راز يې د سوداګري په برخه کې د اسانتیاوو پر ځای ننګونې رامنځته کړې.
دوی د پاکستان حکومت له لوري دغه اقدام په اقتصادي برخه کې د دواړو هېوادونو او سوداګرو لپاره جدي ننګونې ګڼي.
سوداګر عبدالجبار ساپی وايي:« که چېرې افغانستان او پاکستان له یو بل سره منظمې سوداګریزې اړیکې ټینګې کړې، زموږ لپاره کراچۍ کې پاکستان ستونزې جوړې نه کړي، تورخم یا په نورو برخو کې ستونزې جوړې نه کړي، یا زموږ د تازه سبزیو او مېوو لپاره ستونزې جوړې نه کړي، منظمه راکړه ورکړه ولرو، زموږ د دواړو اقتصادي برخه به ډېر پرمختګ وکړي او ډېر مخکې به ولاړ شو.»
دعمران خان له بند څخه د ازادېدو لپاره د تحریک انصاف ګوند د پلویانو له لوري په تېره اوونۍ کې پراخه لاریونونه چې د اسلام اباد تر ډيپلوماتیکو سیمو پورې ورسېدل نه یوازې لسګونو لاریون کوونکو او پولیسو ته یې مرګ ژوبله واوړله، بلکې د دې ترڅنګ یې په اسلام اباد کې د لنډ مهاله لپاره د بهرنیو هېوادونو د استازولیو فعالیتونه هم وځنډول.
په ورته مهال د سرپرست حکومت مسووولین د پاکستان د پوځي چارواکو له لوري هغه ادعا ته چې دت حریک انصاف په لاریونونو کې دافغانانو دښکلتیا په اړه یې کړي څه نه وايي خو په دغه هېواد کې د افغانستان سفارت د فعالیتونو بېرته پیلېدو خبر ورکوي.
