په کابل کې د شیعه علماوو اړوند امامیه علماوو شورا د شبنې په ورځ د «۱۴۰۰ کال د وږي ۶ مه» ناسته وکړه او ګډونوالو یې وویل، افغانان مسلمانان دي او د خوښې نظام یې اسلامي دی، نو نړۍ دې د افغانستان اسلامي امارت په رسمیت وپېژني او اقتصادي او دیپلوماتیکې اړیکې او راشه درشه دې پیل کړي.
د امامیه شورا مشر محمد حسین جعفري وايي:« بهرنیان او نړیواله ټولنه مکلف دي، چې دغه اسلامي نظام په رسمیت وپېژني. دوی وايي، په ډېموکراسۍ کې د خلکو اراده یو اصل دی، نو په افغانستان کې هم خلک اسلامي نظام غواړي.»
دوی له طالبانو دا هم غواړي چې د دوی حقوق او امنیت خوندي کړي، ټول شموله حکومت اعلان او خلکو ته د کار کولو زمینه برابره کړي.
جعفري وايي:« د سمت او ان د مذهب ټېکه دارانو لاس باید ونیول شي،یو وسیع البنیاد اسلامي نظام باید جوړ شي. زه د لوی خدای (ج) له درباره دا هېله لرم،چې له موږ سره به مرسته کوي.»
دغه علماء د کابل په هوایي ډګر کې برید د بهرنیو هېوادونو کار بولي او له طالبانو غواړي،چې په اړه یې دقیقې څېړنې وکړي.
