د ګډ امنیتي تړون سازمان(سي.اېس.ټي.او) غړیو هېوادونو د قزاقستان په پلازمېنه آستانه کې د بهرنیو چارو وزیرانو له غونډې وروسته په یوه ګډه اعلامیه کې ویلي، افغانستان کې د وسله والو ډلو د شتون په اړه اندېښنه لري.
د روسیې ټاس خبري آژانس د یادې اعلامیې په حواله لیکلي، په افغانستان کې شته ترهګرې ډلې د یاد سازمان غړیو هېوادونو امنیت ته جدي ګواښ دی.
د ګډې اعلامیې یوه برخه:« موږ په جدي ډول په افغانستان کې د امنیتي وضعیت په برخه کې له ترهګرو ګواښونو اندېښمن یو. دې ته په اشارې چې په افغانستان کې شته ترهګرې ډلې د ګډ امنیتي تړون سازمان غړیو هېوادونو امنیت ته جدي ګواښ دی.»
په اعلامیه کې یو ځل بیا په افغانستان کې د داسې ټولګډونه حکومت رامنځته کېدو سپارښتنه شوې چې په کې د ټولو ټولنیزو او مذهبي ډلو ګټې خوندي وي او د زده کړو او کار په ګډون د ښځو او نجونو او دغه راز ټولو افغانانو د اساسي حقونو په وړاندې خپل مسولیتونه اداء کړي.
ورته مهال، د روسیې ولسمشر ولادیمیرپوتین د همدې سازمان د ګډې ناستې په څنډه کې که څه هم د افغانستان وضعیت پېچلی بللی خو وايي، دغه وضعیت د ثبات خواته روان دی او دی هیله لري چې له سرپرست حکومت سره شته دوه اړخیزې اړیکې لاپراخې کړي.
پوتین زیاته کړې:« سره له دې چې په افغانستان کې وضعیت پېچلی دی؛ خو موږ هيله لرو له افغانستان سره پیاوړې اړیکې ورغوو. موږ په حقیقت سترګې نه شو پټولی چې په افغانستان کې وضعیت د ثبات خواته روان دی. موږ د افغانستان له اوسنیو چارواکو سره دوه اړخیزې اړیکې ټینګې کړې او دغه اړیکې به په راتلونکي کې لاپسې پراخې شي.»
د اسلامي امارت ویاند د وسله والو ډلو د حضور او فعالیت په تړاو د ګډ امنیتي تړون سازمان د غړیو هېوادونو اندېښنې بېځایه او د تعجب وړ ګڼي او وايي، افغانستان دا مهال تر بل هر وخت امن دی او له دې ځایه بل هېواد ته د زیان او ضرر اوښتو احتمال نه لیدل کېږي.
ذبیح الله مجاهد د روسیې ولسمشر څرګندونو ته په اشارې وايي، سرپرست حکومت له دې هېواد سربېره د سیمې او نړۍ له ټولو هېوادونو سره د رغنده اړیکو په لټه کې دی.
مجاهد زیاتوي: « موږ د ګډ امنیتي تړون سازمان تشویش واورېده خو په ځای یې نه بولم؛ افغانستان اوس امن دی او له دې ځایه هېڅ هېواد ته زیان او ضرر نه رسېږي. بله خبره دا ده چې افغانستان کې یو واحد نظام حاکم دی چې په ټوله خاوره کنټرول لري. دغه ډول تشویشونه له تېرو درې نیم کالو راهیسې شته، خو سره له دې چې چا ته ضرر نه دی رسېدلی مګر بیا هم تشویش ښودل کېږي، دا د تعجب وړ ده او داسې یې بولو چې ځینې هېوادونه د افغانستان د امنیت په اړه په لوی لاس تبلیغات کوي او یا سم معلومات ورته نه رسېږي. دویمه خبره دا ده چې د افغانستان او مسکو اړیکې په ډېر ښه حالت کې دي او موږ کوشش کوو چې له ټولو هېوادونو سره د افغانستان اړیکې مثبتې او ښې وي.»
ورته مهال، د ترکیې انادولو خبري آژانس د دې غونډې په حواله لیکلي، د ګډ امنیتي تړون سازمان د سوله ییز، خپلواک، متحد او له جګړې، ترهګرۍ او نشه یي توکو پاک افغانستان ملاتړ کوي او له اوسنیو چارواکو غواړي چې له ترهګرۍ او نشه یي توکو سره خپله مبارزه لا ګړندۍ کړي.
د دې ترڅنګ، ګډ امنیتي تړون سازمان له نړیوالې ټولنې هم غوښتي چې له افغانستان سره د بشري مرستو او بنسټیزو پروژو د رغولو او پراختیا په برخه کې مرستې یاتې کړي.
د سیاسي چارو شنونکی شېر حسن حسن وايي: « روسیه له افغانستان سره د ښو اړیکو جوړولو ته لېواله ده، ځکه روسیه هم په اقتصادي او هم په سیاسي او امنیتي ډګر کې له افغانستان سره اړیکو جوړولو ته ضرورت لري. همدارنګه افغانستان له روسیې سره د یوه داسې ابر قدرت په توګه چې په سیمه کې د اړیکو یوه سابقه هم لري، د ښو اړیکو لپاره هم زمینه مساعده ده او هم لېوالتیا موجوده ده.»
د ګډ امنیتي تړون د بهرنیو چارو وزیرانو له غونډې وروسته خپره شوې اعلامیه کې دغه راز راغلي، د افغانستان اقتصادي پرمختګ او د نړیوالې ټولنې په اقتصادي سیسټم کې یې ادغام د نړۍ پر ګټه دی او له نړیوالې سولې او ثبات سره مرسته کولی شي.
