په کابل کې د ملګرو ملتونو سياسي استازولۍ(یوناما) په خپره کړې اعلاميه کې د یوې ځانګړې کاري ډلې د جوړېدو خبر ورکړی.
د اعلاميې له مخې، دا ډله به له اسلامي امارت سره د هېوادونو همغږۍ او خبرو اترو ترڅنګ، په افغانستان کې د نشه يي توکو پر وړاندې مبارزه هم څاري.
د اعلامیې یوه برخه:« د دې کاري ډلې د جوړولو پلان د خپلواکې ارزونې د هغو سپارښتنو پر بنسټ دی چې امنیت شورا ته وړاندې شوې؛ ترڅو د افغانانو د ګټو لپاره د افغانستان له واکمنو چارواکو سره د لا ثابت، همغږي او منظم تعامل بهیر تعقیب کړي.»
که څه هم د اسلامي امارت چارواکي د دې کارې ډلې په اړه څه نه وايي، خو له دې وړاندې يې په وار وار په افغانستان کې د نشه يي توکو پر وړاندې د جدې مبارزې ادعا کړې.
د سیاسي چارو کارپوهان وايي، د ملګرو ملتونو ترڅنګ ډېرو هېوادونو هم د افغانستان روانو حالاتو په اړه غونډې کړې، خو تر اوسه يي احساسېدونکې پایله نه ده لرلې؛ خو د دې کاري ډلې له فعاليتونو د مثبتې پايلې تمه کېدای شي.
د سیاسي چارو کارپوه توریالی ځاځی وايي: « په نړۍ، سیمه، ګاونډ، ملګرو ملتونو او دوحې کې مختلفې غونډې جوړې شوې. همدارنګه د مختلفو هېوادونو له خوا استازي وټاکل شول او افغانستان ته یې سفرونه وکړل، خو د افغانستان لپاره یې هېڅ ډول مثبته پایله نه لرله.»
خو ځينې نور بیا له هېوادونو سره تعامل د اسلامي امارت مسووليت بولي او په خبره يې، دې هدف ته د رسېدو لپاره باید د نړيوالو مشروع غوښتنو منلو ته چې د ولس غوښتنې هم دي غاړه کېږدي.
د سیاسي چارو شنونکی اختر محمد راسخ وايي: « باید داسې یو نظام جوړ شي چې ټول افغانان په کې ځان وګوري، ښځو او نجونو ته د کار او ښوونځيو دروازې خلاصې شي. که چېرې دا کمیسیون دا وړتیا لري او بریا ته ورسېږي چې طالبانو ته قناعت ورکړي؛ ترڅو طالبان د نړۍ، اسلامي او ګاونډیو هېوادونو وړاندیزونو ته لبیک ووايي.»
د سیاسي چارو شنونکی شهسوار سنګروال وايي: « که څه هم د نشه يي توکو کرنه تر ډېره پورې کابو شوې ده، خو نړیوال کولی شي خپلو اندېښنو ته د مخامخ خبرو له لارې د پای ټکی کېږدي. ښه خبره دا ده چې دواړه غاړې له دې فرصته ښه ګټه واخلي؛ ځکه که چېرې اسلامي امارت له نړۍ او سیاسي تعاملاتو همداسې لرې پاتې شي، زه فکر کوم دا د افغانستان د خلکو لپاره نور د زغم وړ نه ده.»
که څه هم تر اوسه د دې کاري ډلې د غړیو په اړه مالومات نه دي خپاره شوي، خو د ملګرو ملتونو په نوښت د دوحې درېیمې ناستې د پرېکړو پر بنسټ، ټاکل شوې چې د اقتصاد په نوم یوه بله کاري ډله هم جوړه شي.
د دوحې درېیمه ناسته د دوو ورځو لپاره د روان ۲۰۲۴ زېږدیز کال د جون په ۳۰ مه او د جولای په لومړۍ نېټه د افغانستان لپاره د ځېنو هېوادونو د ځانګړو استازو په حضور کې ترسره شوه.
