که څه هم روسیي چارواکو له سرپرست حکومت سره د مثبتو اړېکو پر پراختیا او پیاوړتیا ټینګار کړی، خو وايي، تر اوسه یې د ترهګرو ډلو له نوملړه د اسلامي امارت د لرې کولو پرېکړه نه ده کړې.
د کرملین ویاند دیمیتري پسکوف وایي، د ترهګرو له نوملړه د اسلامي امارت په اړه د روسیې د پرېکړې جزئیات به د يادې پرېکړې له وروستي کېدو وروسته اعلان شي.
د سې شنبې په ورځ د روسیې یو شمېر سناتورانو او د مشرانو جرګې (دوما) غړیو چې د يوه دولتي واحد په توګه د روسيې د حکومت په پرېکړو کې رول لري، د دې هېواد پارلمان ته د ترهګرو له نوملړه د طالبانو غورځنګ د ايستلو یوه لایحه وړاندې کړه.
پسکوف په یوه خبري کنفرانس کې خبریالانو ته ویلي، مسکو له تېرو درېيو کلونو راهیسې په افغانستان کې له اوسني سرپرست حکومت سره اړېکې ساتلې دي.
هغه زیاته کړې: « دا ډېره مهمه ده چې په افغانستان کې له اوسني سرپرست حکومت او د دې حکومت له مشرتابه سره چې په افغانستان کې واکمن دي، اړیکې ټینګې وساتو. په تېره بیا دا چې دغه هېواد په یوه ګاونډۍ سیمه کې پروت دی.»
د کورنیو چارو وزارت بیا د روسیې د ملي امنیت شورا منشي له خولې ویلي و چې له ممنوعه ډلو د سرپرست حکومت د چارواکو د نومونو لرې کولو بهیر وروستي پړاو ته رسېدلی او په لنډ وخت کې به بشپړ شي.
د کورنیو چارو وزارت ویاند مفتي عبدالمتین قانع وايي: « ښاغلي شویګو ډاډ ورکړ چې د روسیې حکومت د طالبانو تحریک چې پخوا یې اسلامي امارت په دې نوم یاداوه، له ممنوعه ډلو د لرې کولو بهیر وروستیو پړاونو ته رسېدلی. هغه هیله څرګنده کړه چې دا مرحله به په لنډ وخت کې بشپړه شي او له دې وروسته به د دواړو هېوادونو ترمنځ په مختلفو برخو کې اړیکې پراختیا ومومي.»
د روسيې د بهرنيو چارو وزارت مرستيال اندري روډينکو هم ټاس خبري آژانس ته ویلي، که په قانوني ډول په افغانستان کې د سرپرست حکومت چارواکي له تور نوملړه وايستل شي، د کابل او مسکو تر منځ همکاري به نوره هم ورسره زیاته شي.
د چارو څارونکي وایي، روسیه هڅه کوي د افغانستان روان سیاسي او امنیتي وضعیت ته په کتو له سرپرست حکومت او چارواکو سره اړېکې وساتي.
د سیاسي چارو شنونکی عزیز معارج وايي: « اصلا ً روسیه غواړي د اسلامي امارت چارواکي ځانته نږدې کړي. دوی د خپل سیال لپاره یو هدف او پروګرام لري ترڅو د هغوی حساسیتونه راوپاروي. بله خوا، غواړي طالبان له تور لېسته وباسي، خو دا چې د ملګرو ملتونو سازمان پرېکړه ده، نو جرئت نه شي کولی، بلکې یوازې اعلانونه کوي، شواهدو او ذهنیتونو ته ګوري چې څه ډول غبرګون ښيي. همدې ته په کتو ورو ورو قدمونه اخلي او دا چې وايي له لېسته یې وباسو، مانا دا چې دوی له ځان سره دا پرېکړه کړې خو حالاتو ته په کتو به عملي ګامونه پورته کوي.»
د دوما له لوري د روسيې پارلمان ته وړانديز شوې لایحې په تصویب کېدو سره مسکو کولی شي، ځینې ممنوعه سازمانونه په لنډمهالي ډول د ترهګرو او ممنوعه سازمانونو له تور لېسته وباسي یا یې د تعلیق په حالت کې راولي.
