په کابل کې د یوه خصوصي پوهنتون استادانو د ادب او اسلامي فرهنګ د پراختیا په برخه کې د مولانا جلالالدین محمد بلخي مقام ته د درناوي په موخه غونډه رابللې وه.
د پوهنتون استادانو د ادب او اسلامي فرهنګ د پراختیا په برخه کې د مولانا جلال الدین محمد بلخي نوم او مقام وستایه او په خبره یې، د مولانا بلخي د کارونو او فعالیتونو درناوی د تاریخي ویاړونو درناوی دی او په دې اړه د ځوانانو پوهاوی مهم دی.
د یوه خصوصي پوهنتون علمي مرستيال ابراهيم ساپی وايي: « ډېره هڅه وکړئ داسې خبرونه او مسایل خپاره کړی چې د افغانستان د خلکو او دولت پر ګټه وي.»
د پوهنتون استاد رشاد عظیمي وايي: « د مولانا د افکارو د میراث لرونکو په توګه موږ او اکاډمیک بنسټونه مسوولیت او مکلفیت لرو چې د بلخي مولانا افکار او ذهني پانګه د بشري ژوند په مختلفو اړخونو کې تر غور، څېړنې، شرح او تفسیر لاندې ونیسو.»
ځینې نور استادان هم مولانا جلال الدین محمد بلخي د معنویاتو، اخلاقو او فکري شتمنۍ سمبول بولي او دغه راز مولانا د ټولې انساني نړۍ ګډه شتمني یادوي.
دوی د مولانا د کړنو او فعالیتونو له ستایني سره وايي، نوموړي د اسلامي فرهنګ او علومو د پراختیا په برخه کې ستر خدمتونه کړي او ارزښتناک آثار ترې را پاتې دي.
د پوهنتون استاد دوکتور مصطفی عاقلي وايي: « زموږ ګاونډی هېواد ایران بلکې په چین، هند او نورو هغو ټولو سیمو کې چې موږ یې غیر غرب بولو، باید دا موضوع په پام کې ونیول شي چې اړتیا نه شته باید علم او معرفت نړۍ شمول وي یا هم له یوې ځانګړې بېلګې څخه پيروي وکړي چې هغه هم باید غربي بېلګې وي.»
د پوهنتون استاد دوکتور باقر حسیني وايي: « یو بحث حقانیت، حقیقت، صداقت او د خبرونو روڼتیا ده؛ بل بحث الهام بښنه او لارښوونه ده.»
مولانا په ۶۰۴ هجري قمري کال په بلخ کې زیږېدلی. نوموړی ژبور او عارف انسان و. هغه د خپل عمر په ۶۶ کلونو کې ۶ زره بیتونه ليکلي. مثنوي او معنوي او د شمس تبریزي دېوان يې مشهور ليکلي آثار دي.
