د ګډ امنیتي تړون سازمان سرمنشي د بېلاروس له اېس.ټي.وي ټلویزیون سره په مرکه کې ویلي، د یاد سازمان غړي هېوادونه به د پنجشنبې پر ورځ هغه سند تصویب کړي چې له مخې یې د افغانستان او تاجیکستان پر ګډه پوله امنیتي کمربند جوړېږي.
ایمانقلي تاسماګامبتوف زیاته کړې، په افغانستان کې له امنیتي پرمختګونو سربېره له دغه هېواده مرکزي آسیا هېوادونو ته د ترهګرۍ ګواښ لاهم جدي دی.
هغه د دې سند تصویب او پلي کول د مرکزي آسیا هېوادونو د ثبات د پیاوړي کولو لپاره مهم بللی.
هغه زیاته کړې: « سږ کال به د ګډ امنیتي تړون په سازمان کې ډېر مهم سند تصویب شي. دا سند د افغانستان او تاجیکستان ترمنځ د ګډې پولې د امنیت لپاره ارزښتمند دی؛ ځکه د افغانستان د مسایلو اروزنه او تعقیب د دې سازمان یو له مهمو فعالیتونو دي. دا چې په افغانستان کې امنیتي پرمختګونه شوي، خو لا هم مرکزي آسیا ته د ترهګرۍ جدي ګواښونه موجود دي.»
که څه هم د ګډ امنيتي تړون سازمان سرمنشي وروستيو څرګندونو په اړه د سرپرست حکومت مسوولینو زموږ اړيکو ته ځواب را نه کړ، خو مخکې يې تل دا ډول اندېښنې بې ځایه بللې او ويلي دي چې له افغان خاورې د ګاونډيو او سیمې هېوادونو په ګډون هېڅ هېواد ته امنیتي ګواښ نه دی ور پېښ.
د سیاسي چارو کارپوهان وايي، له څو لسیزو راهیسې په افغانستان کې جګړو او تاوتریخوالو د دې هېواد پر ثبات بې باوري رامنځته کړې.
د سیاسي چارو کارپوه محمد زلمی افغانیار وايي: « د ګډ امنیتي تړون سازمان د سرمنشي پیغام سیاسي موج سواري ده. په تېرو درېیو نیمو کالو کې اقتصاد محوره حکومت د نورو هېوادونو په داخلي چارو کې لاسوهنه نه کول مطرح کړي. آيا په بدل کې د سیمې او همدې سازمان غړیو هېوادونو افغانستان ته دا ډول اطمینان ورکړی؟ ټولو تقابلاتو ته د خبرو اترو له لارې حل پيدا کېږي. زه هیله لرم تقابلاتو ته د خبرو اترو له لارې حل پيدا کړي، نه دا چې د سیسټماټیکو فشارونو له لارې داسې پيغامونه مطرح کړي چې د افغانستان او نړیوالې ټولنې ترمنځ له پخوا ډېره فاصله ایجاد کړي.»
د ګډ امنیتي تړون سازمان سرمنشي تېره میاشت هم د افغانستان او تاجیکستان له ګډې پولې سره د امنیتي کمربند جوړېدل د ترهګرۍ د پراخېدو مخنیوي او د دې سازمان د غړیو هېوادونو ثبات ته مهم بللی و.
