د لسو ورځو په تېرېدو سره لاهم د کابل له نړیوال هوايي ډګره په قانوني او اسانه توګه بهر ته تګ ناشونی دی.
هغه کسان،چې بهرنی پاسپورت او قانوني اسناد لري، نیوکه کوي، چې د ګڼې ګوڼې له امله بې سرنوشته پاتې دي.
د کابل ښار اوسېدونکی وايي:« که څه هم ذبیح الله مجاهد ویلي وه،چې ټولو کسانو ته عفوه شوې،خو له دې سره سره د شپې له لوري طالبان زما کور ته راغلي ول. زه په دشتي برچي سیمه کې اوسېږم. کله چې زما امنیت خوندي نه وي او وسله هم ونه لرم، نو ښکاره ده،چې ګواښ سره مخ یم.»
یو شمېر کسان بیا له پنځو ورځو راهیسې د هوايي ډګر تر څنګ ناست دي،خو بیا هم نه توانیدلي،چې دننه شي او طالبانو یې مخنیوی کړی دی.
د کابل ښار اوسېدونکی: « زه اسناد په لاس کې لرم. برېښنا لیک هم راته شوی دی. خو ګڼه ګوڼه زیاته ده.دا ګڼه ګوڼه هغو کسانو جوړه کړې، چې اسناد په لاس کې نه لري. همدا لامل دی،چې د طالبانو او د بهرنیو له لوري مو مخه نیول کېږي او دروازې تړي.چاته اجازه نه ورکوي،چې میدان ته دننه شي.»
د طالبانو ویاند ذبیح الله مجاهد بیا له خلکو غوښتي،چې خپلو کورونو ته ستانه شي او دغه راز یې له امریکایانو هم غوښتنه کړې،چې خلک دې د هېواد پرېښودلو ته نه هڅوي.
مجاهد زیاته کړه:« د اسلامي امارت هڅه کوي،چې ګڼه ګوڼه کمه کړي. هغه کسان په هوايي ډګر کې راټول شوي، ډاډ ورکوم،چې راشي، خپلو کورونو ته او ارام ژوند ته راوګرځي. خلک دې عادي ژوند وکړي او هېچا ته هم ګواښ پېښ نه دی. موږ دوی ته بشپړ ډاډ ورکوو.»
د امریکا ولسمشر جو بایډن، په ټینګار سره ویلي، باوري دی،چې له افغانستانه به د امریکايي وګړو او کارکوونکو د اېستلو بهیر به د روانې اګست میاشتې د پای تر ټاکل شوې نېټې پورې بشپړ شي.
بایډن سه شنبه سپینه ماڼۍ کې په خپلو ټلویزیوني څرګندونو کې زیاته کړه،چې له کابله د الوتنو شمېر ډېر شوی او په وینا یې، ټول هغه کسان به پاتې ورځو کې و اېستل شي، چې په اړوندو شرایطو برابر وي.