په کابل کې د کار نړیوال سازمان له لوري جوړ شوي ورکشاپ کې چې د نړیوالو ادارو ترڅنګ د ګڼو وزارتونو او خصوصي سکټور استازو هم په کې ګډون کړی، مسوولینو په افغانستان کې د کار محوره پانګونې، کاري خوندیتابه او د کار په بدل کې د مزد ټاکنې په څېر په ګڼو مسایلو خبرې وکړې.
په افغانستان کې د ملګرو ملتونو اړوند د کار نړیوال سازمان په هېواد کې د بنسټیزو او ساختماني پروژو پر مهال د کارګرانو پرخوندیتوب او هغوی ته د مناسبې اجورې پر ورکړې ټینګار وکړ.
د کار نړیوال سازمان تخنیکي متخصص منظور خالق وايي: « موږ په افغانستان کې د کار نړیوالو اصولو د ملاتړ په لټه کې یو؛ تر څو کارګرانو ته د عادلانه مزد د ورکړې، بنسټیزو پروګرامونو او د بېلابېلو فعالیتونو او پراختیايي مهارتونو د لوړونې په برخه کې مناسب سټنډردونه او کړنلارې ایجاد کړو. همدارنګه ډاډ ترلاسه کړو چې ماشومان د کار ساحې ته د تګ پر ځای ښوونځیو ته لاړ شي.»
په افغانستان کې د کار نړيوالو سازمان همغږی کوونکی او رییس رامین بهزاد وايي، دغه سازمان د افغانستان په شمال کې د ګڼو پروژو د پلي کولو له لارې زرګونه کسانو ته د کار زمینه برابره کړې ده.
بهزاد په دې اړه وايي: « موږ ویاړو چې په افغانستان او په ځانګړي ډول د هېواد په شمال کې مو ۱۲ بنسټیزې پروژې پلي کړې. له دغو پروژو شاوخوا ۱۳۲زره کسانو ګټه اخیستې. موږ په مستقیم ډول ۶ زره کسانو ته چې نارینه، مېرمنې او معلولیت لرونکي کسان دي، کاري فرصتونه ایجاد کړي. زموږ په پروژو کې د پروژو د پلي کېدا پر وخت کاري عزت او د کارګرانو خوندیتوب ته پام شوی.»
بل پلو، د کار او ټولنیزو چارو وزارت مسوولین وايي، په هېواد کې د کار نړیوالو اصولو له پلي کولو څارنه او له سرغړوونکو سره قانوني چلن کېږي.
دوی دغه راز وايي، د ماشومانو د کار مساله جدي نیسي او له همدې کبله یې تر دې دمه څه د پاسه ۸۰۰ زره ماشومانو ته د حرفوي زده کړو د چاپېریال برابرولو له لارې، هغوی له درنو کارونو راګرځولي دي.
د کار او ټولنیزو چارو وزارت د تفتیش او کار لارښونې رییس عبدالمتین مولوي زاده وايي: « افغانستان کې د درنو کارونو په اړه باید ووایم چې ځېنو سیمو کې پر درنو کارونو بوخت یو شمېر کوچني ماشومان تثبیت شوي. د دغو کسانو لپاره د کار وزارت له خوا سیار ګروپونه تعیین شوي او رسېدنه شوې؛ په ځانګړې توګه د خښتو بټیو په سیمو کې چې په کم عمره ماشومانو باندې کوم کارونه کېږي، دا ماشومان ژغورل شوي او له دغو ځایونو ایستل شوي او لپاره یې حرفې ټاکل شوې او د تعلیم ترڅنګ به د سپکو کارونو حرفه هم زده کوي.»
که څه هم په دې ورکشاپ کې د کاریګرو خونديتوب ترڅنګ د ماشومانو له لوري د درنو کارونو پر مخنيوي تمرکز کېږي، خو لا هم په افغانستان کې دې مسايلو ته جدي پام نه دی شوی او اوس هم ډېری ماشومان د بېوزلۍ او اقتصادي ستونزو له امله درنو کارونو ته اړ کېږي.
