افغاني سرې میاشتې ټولنې د بغلان ولایت په ده صلاح ولسوالۍ کې ۱۰۰۰ اړمنو کورنیو سره د ۳۰ میلیونه افغانیو نغدي مرسته وکړه.
د دغې ټولنې مسوولین وايي، هرې کورنۍ ته ۳۰ زره افغانۍ وېشل شوې دي.
په شمال ختیځ زون کې د افغاني سرې میاشتې ټولنې رییس محمد شفیع هجرت وايي:« تاسو نن د بغلان ولایت په ده صلاح ولسوالۍ کې زرو کورنیو ته د نغدو پيسو د وېش لیدونکي یاست. دغه نغدي مرسته د سره صلیب نړیوالې کمېټې له خوا جګړه ځپلو کسانو، یتیمانو، کونډو او اړمنو ته ورکول کېږي.»
په بغلان کې د افغاني سرې مياشتې ټولنې رییس ډاکټرجان محمد موسی زی وايي: « هغه هېوادوال چې معیوب، معلول، کونډې، یتیمان، بېځایه شوي او سېلاب ځپلي یا مستحق وي، مرسته ورسره کېږي. نن ټولټال ۳۰ میلیونه افغانۍ او هرې کورنۍ ته ۳۰ زره افغانۍ ورکول کېږي.»
د ده صلاح ولسوالۍ هغو اوسیدونکو چې د افغاني سرې میاشتې ټولنې دغه نغدي مرستې يې ترلاسه کړې دي، له مرستو خوښيي ښيي او غوښتنه کوي چې افغاني سره میاشت دې له دوی سره په دوامداره ډول مرسته وکړي، ترڅو اقتصادي ستونزې يې هوارې شي.
له مرستې برخمن شوی عبدالمحمد وايي: « دا خلک بېوزله دي او هېڅ نه لري. د دغو مرستو وېش د اړمنو کسانو د اقتصاد ښه کېدو لپاره یوه ښه مرسته ده. له اسلامي امارت مننه کوو چې ښه امنیت یې نیولی او د اړمنو کسانو موندلو لپاره هر کلي ته لاړل او سروې یې وکړه.»
له مرستې برخمن شوی محمد الله وايي: « له افغاني سرې میاشتې ټولنې مننه کوم چې موږ ته یې ۳۰ زره افغانۍ مرسته راکړه. نن د ده صلاح ولسوالۍ ۱۰۰۰ کورنیو ته مرسته ورکوي. موږ ته یې ځکه دغه مرسته راکړه چې موږ په کورنۍ کې یو تن معیوب لرو. اوس کولی شو په دې پیسو د خپل معیوب درملنه وکړو او د کابل یا مزار روغتونونو ته یې ولېږدوو.»
همدارنګه د افغاني سرې میاشتې ټولنې مسوولین وايي، د ژمي په موسم کې د بېوزلو او اړمنو کورنیو د اقتصادي ستونزو د حل په موخه یې په بدخشان او بغلان ولایتونو کې نغدي مرستې وېشلې او هڅه کوي څو په دوامداره توګه په نورو ولایتونو کې هم له بېوزلو کورنیو سره نغدي مرستې وکړي.
