د افغانستان لپاره د جرمني ځانګړي استازي په قطر کې له طالب استازو سره د لیدنې پر مهال ویلي، چې جرمني په افغانستان کې خپلو بشري مرستو ته دوام ورکوي او په ټپه ولاړې پروژې بېرته پیلوي.
قطر کې د طالبانو د سیاسي دفتر ویاند ډاکتر محمد نعیم پر خپله تویټر پاڼه لیکلي، د افغانستان لپاره د جرمني سفیر مارکس پوتزل د اسلامي امارت د سیاسي دفتر له مرستیال شیر محمد عباس ستانکزي او ورسره هیئت سره په دوحه کې وکتل.
ډاکتر نعیم لیکلي، کتنه کې پر سیاسي مسائلو او کابل هوایي ډګر کې په رامنځته شوي وضعیت خبرې وشوې.
د نعیم په خبره، د اسلامي امارت لخوا وویل شول، چې بهرني ځواکونه باید په ټاکلي وخت ووځي، چې ملکي پروازونو ته زمینه برابره شي.
نوموړي زیاته کړې، چې جرمني هيئت له افغانستان سره د بشري مرستو پر دوام ټینګار وکړ او زیاته یې کړه، چې د وضعیت له عادي کېدو وروسته به درېدلې پروژې بېرته پيل شي.